João 4:8-46

⁸(Târâpa ani xina Jesus eynynonro modo, pyni sanâse xidadâam idâypyem.)

⁹Pekodo aguely: — Judeu âmâ, samaritana urâ warâ. Ypemugudo, âpemugudo agâ âjizetonro mâkeba; koendâ oxioni keba warâ. Xina adakuihobyry oday, madakuidyzedo mâkeba âmaemo. Awylygue ywalu etary odano ewy mâenyhoem mâenkaduo, kâseguâdâdyly — kely pekodo. Mâkâ pekodo arâ aguely, judeu domodo, samaritano domodo warâ âjizetonro keba awylymogue. Samaria donro modo adakuihobyry oday nadakuiwâbyra judeu domodo.

¹⁰Aituo Jesus aguely: — Deus âmâem nhuduly mâuntuly ânguy paru ekani awyly warâ mâuntuly watay, yam paru tâkaze tâise âmâ mâenyhoem. Yam mâenkaduo, âyam tuduze tâise urâ. Mâenyly-ro watay, iweloem tâiehoze tâise âmâ; âigueduo, aunloenlâ Deus agâ mitoem eyam tâtâze tâise âmâ — kely Jesus.

¹¹— Tâsanigue xirâ paru etary, etyho peba âmâ-ro warâ. Nuduwâpyra paru iweloem yetoni yam mâunduhoem, mârâ aunloenlâ Deus agâ witoem ayenehoim.

¹²Saguhoenlâ myakâwândy kydamu Jacó xirâ paru etyho nhesaguehonly. Mâkâ, imeom, eguy modo warâ taunlolâ myakâwândy paru nhenylymo, tâiguewâsemo olâ. “Mâenyly-ro watay, iweloem tâiehoze tâise âmâ” mygueduo, “Jacó takaze ton-honreim urâ” myguelylâ awârâ — kely pekodo.

¹³Aituo Jesus aguely: — Tâwâlâ lelâlâ wâne tatuanzeim modo xirâ paru ewy nhenylymo, inepa lâpylâ olâ ise satuandondylymo.

¹⁴Paru kâunduypy enywânibyry modo olâ ise natuandombyra. Inatagâdo oze aunlolâ paru egasely myara xirâ paru iwâgâ augueho. Deus agâpa nipyra tyenehonzemo mawânrâ kâunduypy. Iguelymo-ro watay, Deusram idâzemo, aunloenlâ eagâ tâitomoem — kely.

¹⁵Aituo pekodo aguely: — Awârâ paru ewy yam âundugâ wao. Arâ ise yatuambyra wawyly. Xirâ paru ese kâetombyra wawyly — kely.

¹⁶— Oso igâseda. Xarâlâ eagâ odopâgâ-ro warâ — kely Jesus.

¹⁷— Tusonuneba urâ — kely pekodo. Jesus aguely: — Âkealâ, “Tusonuneba urâ” myguely.

¹⁸Cinco lelâ tusoneimbyry mawyly, tutuze urâ. Iwerâ ohogüimbyem inkâba âmâ uguondo eagâ mato agâ. Âkealâ amyguely — kely Jesus.

¹⁹Âdaunloem tawyly Jesus agueduo, pekodo âseguâdâdyly. Eyam aguely: — Iweâma tutuze urâ, Deus wâgâ agueim mawyly.

²⁰Xina idamudo Deus nhehoguedyly mykâinane xirâ iwy wâgâ. Âmaemo, judeu domodo olâ “Jerusalémdâ lelâ ehoguedo” tâkeze. Âdaunlo unâka iozeno kuru? — kely.

²¹Aituo Jesus in-hoguly: — Sainse mârâ Deus einwânni modo kuru âdykâingâlâ nhehoguedo, tarâ xirâ iwy Samaria donro wâgâ kulelâba, Deus ety Jerusalém donrodâ kulelâba warâ ise Deus ehoguedyly.

²²Âmaemo, Samaria donro modo, Deus ehogueze tâkewâze wâne âmaemo, mâuntuba olâ âmaemo mâkâ kuru. Xina judeu domodo olâ tutuze, tâinwânse warâ. Judeu ewylâ mawânkâ Deus Ingonotyby imakerinmoem.

²³Sainse mârâ Deus eynynonro modo, Deus ize ato ara kehoem nhehoguedo. Anri awârâ aidyly adaguly-ro warâ. Âdara ioze ehoguedyly awyly xutuen-honze eagâmolâ ise Deus Ispiritury. Deus wâgâ enomedâzemo mâkâ. Awâkâ ioze lelâ ehogueni modo mawânkâ Deus ize ato tohogueniem.

²⁴Tâentuneim mâkeba Deus. Tyispirituryenlâ mâkâ ekaduo nhuduly. Deus Ispiriturygue lelâ Deus nhehoguedyly, ize ato ara kehoem, âkealâ adâkehobyry nhenehon-ho ara — kely.

²⁵Pekodo aguely: — Tutuzelâ urâ, âdaralâ Messias, Deus Ingonotyby, saindyly awyly. Âewyly-ro watay, idânârâ kehoem ise Deus wâgâ kiuntudyze ato aguely — kely.

²⁶— Urâ agâ tunâgueim, Messiaslâ urâ — kely Jesus.

²⁷Mârâ ume kehoem xina odopâdyly, pyni sanânibyryem. Jesus pekodo agâ xunâgu tientuo, tâseguâdâze ani xina. Xina ezewenry keba mawânrâ pekodo tiuntudânry agâ tâdunâgu. — Âdyka merâ agâ ize mato? — xina kepa olâ ani pekodoam. — Âdaituoka awâkâ pekodo agâ âunâgu? — xina kepa gâlâ Jesusram warâ.

²⁸Aituo pekodo idâly, tywalu etary târâlâ nhânly. Xidadâam odopâdyly. Tonlo modoram aguely:

²⁹— Paru ese watay, uguondo âdykâ kâentyby keba xiotai. Idânârâ agânhetaymby modo wâgâ agueanry olâ. Etaungârâ. Messiaslâ keanra mâkâ — kely.

³⁰Aituo agui kurâdo xidadâ odaypa egaselymo. Idâlymo Jesus eydâ atoam.

³¹Pekodo idâpygueduo, xidadâ odano modo saindyly ume, xina aguely Jesusram: — Anra xina nhanâtyby pyni. Kydâwinduane, Konomedâni — xina kely.

³²Jesus olâ aguely xinaram: — Mâenetybymo kâinwâpyra ise urâ. Tâlâ urâ mâenetybymo takaze kehoem, pyni koendonro. Âdy augueho awyly mâuntuba lelâ olâ âmaemo — kely.

³³Aituo xina aguely: — Ânguylâ keanra ipyniry nenetai — xina kely.

³⁴— Ânguy ypyniry nenetaymba. Mâkâ ugononibyry agânhetoem aguehobyry aiedylylâ ypyniry. Idânârâ ize ato agânhetuo, âdy izetonze inkâba urâ, tuomare lelâ, âwinduatybyen-ro waunlo ara lelâ.

³⁵Wamyguelymo inanry: “Quatro nunâ pygueduo kientâdyby kienkaunâdyly lelâ ise” myguelymo. Etaungâ akaemo âeni modo. Trigu ekaunâdo odaxi ityby emyenro akaemo. Iwerâ koendâlâ Deus itaumbyry eyanmo egatuhoem; iweâpa tâiseba itaungâ.

³⁶— Etânibyry, ekaunânibyry warâ tâzepywaozemo. Koendâ lelâ âzekaunâdyly watay, tohomaenzemo. Arâ lâpylâ, waunroem ywâgâ egatuwânibyry modo, ilâpyryem ywâgâ imâem kuru enomedânibyry modo warâ ohomaendyly ise, aguelymo idani modo yeinwândylygue.

³⁷Âkealâ wakehonly: “Mâkâ etâni, eagonro pylâ ekaunâni-ro” kehonly.

³⁸Ogonodylymo, ywâgâ mâengatuhomoem. Eagonro ewanugue kulâ âgâmylymo, eagonro nhetâdyby kulâ mâenkaunâguylymo waunlo ara. Saguhoenlâ mawânkâ Messias saindyly wâgâ eagonro modo aguewâm. Unâ mâengatulymo idani modo yeinwânsemo, amyguelymo tindadylygue kulâba olâ, saguhoem ywâgâ aguely tindatybymo tienanâgueduomo — kely Jesus.

³⁹Samaria eynynonro, âtâ anary Sicar donro modo ewy agui myani Jesus Messiaslâ awyly einwânni modo, “Uguondo âdykâ kâentânry xiotai. Idânârâ agânhetaymby modo wâgâ agueanry olâ” pekodo keduo.

⁴⁰Imâem myani Jesus wâgâ tiuntudyze awylymo. Awylygue Jesusram taintuomo, tagâlâ itoem nhekadylymo. Aituo azagâ iguandyly Sicardâ nhakadyly.

⁴¹Mâkâ lelâlâ aguely tindatuomo, kurâ domodo nheinwândylymo Messiaslâ mâkâ awyly.

⁴²Pekodoam aguelymo: — Mâkâ tâinwânse xina iwerâ, mâengatuyby wâgâ kulelâba olâ, xina lelâlâ nhenomedâdo tindatobyry wâgâ. Tutuze xina, idânârâ tâinwânni modo emakeze âetyby awyly — kelymo.

⁴³Târâ azagâ iguandyly sakanibyryem, Jesus agâ Samaria eynynâba xina egasely. Galiléia yan-yam eagâlâ xina idâly.

⁴⁴“Deus itaumbyry egatuim tâinwântuneba ety anano modoram kuru” kely ani Jesus.

⁴⁵Galileiaram xina saintuo olâ ani tonlo modo koendâ kehoem xina nhedaenkulymo. Jerusalémram tâtâzemo myani, Páscoa etygueze. Tâensemo myani târâ Jesus anhetaymby modo. Awylygue koendâ nhedaenkulymo.

⁴⁶Aituo mârâ âjidâpa Jesus âxiguely, xidadâ Canánra odopâdondyly, Galiléia eynynonroam, paru vinhuem tienehon-hombyryam. Tâlâ ani Cafarnaumdâ tâjikeim pymâ emary. Toenzepa myani imery ewânu.