João 4:37-47

³⁷Zaero ahno oturutopõpyry ynara karyhtao, “Toiro arykãko, imepỹ anỹnõko.”

³⁸Kuaropoatose tupito pona oerohtopõpyrykõ kara pona, tykyrysã anỹtohme. Imehnõ toerohse arykary poko samo. Aerohtopõpyrykõ anỹnõko sã matose, tykase Jezu typoetory tomo a.

³⁹Morarame tuhke Jezu tonetupuhse Samariapõkomo a. Nohpo omi poe tonetupuhse toto a, ynara tykase exiryke, “Jenetupuhno mokyro emero ipunaka. Otarãme Kyrixtu mokyro,” tykase nohpo exiryke.

⁴⁰Morarame toytose toto Jezu a Samariapõkomo. —Taro exiko aporo yna maro, tykase toto. Otuhparo toh kynexine tamorepary se toexirykõke. Morara exiryke asakoro tõmehse Jezu moroto.

⁴¹Tuhkehxo tonetupuhse morotõkomo a Jezu omiry etaryke tyya xine.

⁴²Ynara tykase toto nohpo a, —Seromaroro Kyrixtu enetupuhnõko ynanase õmi poe rokẽ pyra. Yna a nymyry aomiry totase. Zuaro ynanase. Kukurãkanekõ nymyry mokyro, tykase toto, Samariapõkomo.

⁴³Morarame asakoro tõmehse ahtao toytose ropa Jezu Karirea pona.

⁴⁴Ynara tykase ynororo, “Toipe Ritonõpo poe urutõkõ oneahmara toto ipataõkomo. Yrome imehnõ pataõkõ Ritonõpo poe urutõkõ eahmãko toto.”

⁴⁵Morarame Karirea pona toeporehkase Jezu ahtao taomikase morotõkomo a. Tãkye toehse toto Jezu eneryke tyya xine. Pake tonese tyya xine Jerusarẽ po, otuhtoh konõto pona toytose tahtao xine. Jezu jamitunuru tonese tyya xine exiryke Jezu waro toto. Wenikehpyra toehse toto.

⁴⁶Mame Kanaa pona toytose ropa Jezu Karirea rãnaõ pona uwa eukurume tuna anyhtanohpotopõpyry pona tyya. Moroto kowenu poetory mũkuru kure pyra kynexine Kapanaũ po.

⁴⁷Mame, “Jezu tooehse ropa Karirea pona, Jutea poe,” kary etaryke tyya toytose ynororo kurãkara zumy Jezu eahmase Kapanaũ pona aytotohme repe, tumũkuru kurãkapotohme ropa, orihsasaka tumũkuru exiryke.