João 3:3-19

³Jesus aguely: — Azeompyra kulâ, Deusgue tywymâguneba âmâ. Arâ lelâ mawânrâ Deus xurâem tâjidyly. Xirâ mâuntudyze kuru wato — kely.

⁴— Âwâ! Ânguy xutuybyem itybyem niazeontaymba! Nuduwâpyra kyze idâhu odaxi kydodopâdoem, kyazeontoem — kely Nicodemos.

⁵Jesus aguely: — Deus Ispirituryam iweloem kydâiehoba, parugue kyazeontaymba kurâ warâ watay, Deusgue tywymâguneba. Xirâ mâuntudyze kuru wato.

⁶Kyze idâhu odayba kâgaseduo, kurâenlâ kyazely. Awârâ keba olâ Deus einwânni modo Deus xurâem ienehoim, Deus Ispiriturylâ iweloem kyenehoim.

⁷Awylygue tâseguâdâzeba ikâ, “Azeontaungâ” uguelygue.

⁸Sapezenru igâky tydase, ponwary, se iwatary warâ nhekânily tâense warâ âmaemo, sapezenru kuru olâ mâempyra âmaemo. Arâ lâpylâ Deus Ispiritury, Deus einwântaynrim modo wâgâ aidyly mâempyra mawylymo; aitobyry modo lelâ mâenkylymo — kely.

⁹Nicodemos aguely: — Kâuntuba lelâ aze. Âdara kuruka amyguehobyry aidyly, Deus Ispiriturygue xina iazeondyly? — kely.

¹⁰Jesus in-hoguly: — Kâzewenry enomedâni âmâ, awârâ olâ mâuntuba âmâ!

¹¹Idakâ. Tiuntuybylâ xina Deus eynynonro âyanmo agueho, tientybylâ xina âyanmo nhegatuly warâ. Arâlâ olâ xina agueho mâinwâmpyra mawylymo.

¹²Xirâ onro anano wâgâ augueduo mâinwâmpyra âmaemo, Deus wâgâ augueduo lakuru ise mâinwâmpyra kuru mawylymo.

¹³Ânguy xirâ anano kulâ Deus ezaxi nâkuwâbyra, iwâgâ egatuze nodopâbyra warâ. Urâ, Uguondo Kaynâpa Âetyby lelâ târâpa xytâguyby. Urâ lelâ Deus wâgâ aguenriem xurutyby — kely Jesus.

¹⁴Aituo aguely: — Enanâguegâ, saguhoem kydamudo Deus einwântânry modo âji âdy peba ato einkâ adakobâday, âgâuram sâtobyry. Deus, Moisés âgâu bronzegueto anhetoem, se wâgâ nhaunâtoem warâ aguewâm, mâkâ âgâuram MYK ityby modo kua itoem. Mâkâ âgâu bronzegueto saunâtobyry ara, arâ lâpylâ ise urâ, Uguondo Kaynâpa Âetyby keho, se wâgâ kadaunâhonly,

¹⁵idânârâ yeinwântaynrim modo, aunloenlâ Deus agâ itomoem.

¹⁶Idânârâ Deus kywynedyly. Awylygue urâ tymery tokaleom ugonodyly. Idânârâ yeinwântaynrim modo eyam âzemakeoze. Deus agâpa tyetunebamo ise, aunlolâ ise eagâ awylymo.

¹⁷Deus ugonodyly, xirâ anano modo igueduo tienagazedoem inkâba, idânârâ yeinwântaynrim modo tienmakehoem.

¹⁸— Urâ Deus imery yeinwântaynrim modo âji tâdâsenagazedoam nâtâwâbyramo ise. Yeinwântânry modo olâ idâze mârâ âji tâdâsenagazedoam, urâ Deus imery tokaleom yeinwâmpyra atomobyry wâgâ, aunloenlâ Deus agâpa ietomoem.

¹⁹Iajinu MAH nheto ara xirâ anaym Deus wâgâ koendonro segatu, urâ Deus imery; Deus xurâ keba modo olâ Deus izepa ato adiendylylâ ize atomo, awylygue yizepa awylymo. Iamu duay adakobâni aramo kulâ, iajinu oday adakobâni ara inkâba. Awârâ mawânrâ yeinwântânry modo aunloenlâ âsenagazedomoem egamehonrimo.