João 2:4-20

⁴Mi'i pote Iesui to'e — U mana kat som etiky­'esat atunug e. Koran te ti yt uipopap i te Tupana esaika hap moherep miit'in miat hamo e toty pe.

⁵Mi'i hawyi ity to'e ienuk nug hat eropat haria pe — Kat e Uimẽpyt ehepe hap ewy ti aru ewetunug no eipo­'oro hap ok tã e.

⁶Mi'i turan itote 6 kamũti wato nu kawiat ko'i tukup­te'en itote miit'in posei hamuat Iuteuria eko ewy. Wẽtup kamũti pe tukup­te'en 15 ekuiru'a piat y'y i'atu'e.

⁷Mi'i hawyi Iesui to'e heropat haria pe — Ewei'a­tue­wo­pyro y'y wo kamũti ko'i e. Mio tã e hawyi ta'a­tu­pyt­'atnug yne ta'a­tue­wo­pyro ra'yn 6 kamũti.

⁸Howapy yne hawyi Iesui to'e i'atuepe — Eweho­'osat ro koitywy kamũti piat kurin hawyi eweipo­me'eg no ienuk hap ka'iwat pe e. Mi'i hawyi ta'a­tue­reto mi'i kape.

⁹Mi'i hawyi ienuk hap ka'iwat hã'ãg na'yn mekewat sapo hy yt y'y hin i ra'yn ma'ato Uwa sapo hy wo ra'yn topy­hu'at y'y. Ma'ato yt toikuap i aikope pywiat Uwa sapo hy wo hap ma'ato heropat haria yn ikuap. Mi'i hawyi ika'iwat tikaykay tuwe­wawi ihary'i rakat nuat.

¹⁰Mi'i hawyi to'e tope — Mehĩ e sa'a­wy­'iwuat ienuk nug hawe ti uruimõ'ẽ miit'in me Uwa sapo hy he rakat e ma'ato wat'ymo ti i'atu'ok hawyi uruimõ'ẽ heĩpyt yt he rakat i ra'yn e ma'ato en wyti yt uru'ewy hin i kat pote wat'ymuat ra'yn po'og he rakat sa'a­wy­'iwuat kai etum uruepe Uwa sapo e. Ta'i he sese ti rat mesuwat sopo hy e iwary pakup takat pe.

¹¹Yt miit'in mikuap ok tã i Iesui ha'a­wynug itote Uwa sapo hy he rakat y'y kawiat 6 kamũti howapy toimo­herep y'y kawiat itote. Sa'a­wy'i yt totag i te turan yt karãpe i Iesui timo­herep tesaika hap iwato hap nug hamuat mekewat Tupana yn inug kuap minug ewy. Sa'a­wy'i toha­'a­wynug mi'i tã tawa Kana pe yi Karireia pe. Toimo­herep Tupana esaika hap topiit pywiat wakuap nug hamuat kuap hap itote. Uwa hy tutunug y'y kawiat te'e­ra­'a­kasa hawyi ti te'e­ro'e ra'yn — Pywo ti rat Iesui ti Tupana Mipo­'oro Aipo­rekuat nuat i'atu'e ipotmu­'eria.

¹²Mi'i hawyi ti Iesui toto tawa Kana kaipyi tawa wato Kawa­na'ũ kape toty to'y­wyt'in sese tehay towy­ria'in wywuat hamo. Mi'i hawyi tukup­te'en porap'i itote.

¹³Mi'i hawyi Iuteuria wa'a­tunug hap e'at put'ok'e irane i ra'yn mekewat te'e­ru­wa­nẽtup aikotã sa'a­wy'i Tupana ti'a­tuhep wanĩ­kaptia po pywiat hap e'at put'ok'e. Mi'i hawyi Iesui toto Tawa koro Ieru­sarẽi kape.

¹⁴Put'ok'e hawyi Tupana mõtypot hap yat wato pe Iesui teke. Mi'i hawyi Tupana mõtypot yat e'okipy tote toi'a­tu­puẽti hũria wewato ahup weneru haria uweria ko'i weneru haria pykasu weneru haria sem toipuẽti i'ewyte toipuẽti tineiru pore­ra'at haria apyk puaria yparakai ypyke tukup­te'en toi'a­tu­puẽti.

¹⁵Mi'i pote Iesui tunug haity kawiat i'atu­'a­piheg hamuat tutunug. Mi'i hawyi haity wo toi'a­tu­sytpok kahato Tupana mõtypot ehũria weneru haria. I'ewyte toi'a­tu­sytpok wewato ahup ko'i uweria ko'i toi'a­tu­sytpok Tupana mõtypot yat pyi. Mi'i hawyi wuat'i etama etineiru pat'ok pat'ok haria yparakai ko'i toi'a­tu­'ã­pe­'okpun na'yn tohytpok yne tineiru ko'i yi tote.

¹⁶Mi'i hawyi Iesui to'e pykasu weneru haria puo — Ewei'a­tu­po­re­nõtem no ehepy­kasu ko'i Tupana mõtypot hap yat pyi e. Wãi yt ewetunug nei'o Ui'ywot mõtypot yat wene­ru'i wene­ru'i ehap yat no e. Moto ro mesu­wepyi e.

¹⁷Toi'a­tu­sopo sopo yne hawyi hemiit'in te'e­ru­wa­nẽtup ta'yn aikotã sa'a­wy'i miwan me tohenoi hap kape — Atiky'e kahato emõtypot yat Tupana e. Emõtypot hap yn atiky­'esat ne'i e mi'i pote ti aru ui'auka teran ne'i e miwan me sa'a­wy'i sese Iesui hap kape Saumu 69.9 pe.

¹⁸Mi'i hawyi Iuteuria akag ko'i apo'i­'a­tu'e — Uwe kahu epo'oro meke tã nug Tupana mõtypot yat piat hamo i'atu'e. Yt naku i meke tã ehap etunug pãi i'atu'e. Kat pote eti'a­tu­sytpok sytpok mesuwe i'atu'e. Tupana epo'oro mi'i tã nug hamo pote etomo­herep to koitywy eminug iwato rakat Tupana esaika hamo uruepiat emohey kuap hamo i'atu'e katu­pono merep hap ewy etimo­herep mesuwe hawyi uruikuap ta'yn Tupana sese epo'oro meke tã nug hamuat hap i'atu'e.

¹⁹Mi'i hawyi toi'a­tu­wesat — Pyno waku iwato kahato atimo­herep ehepe e. Ewei'a­porok meiũwat Tupana yat wato pote ati'ã­pe­'ok'am i ra'yn mye'ym e'at pe yn atunug i ra'yn e Iesui Iuteuria akag ko'i pe.

²⁰— Eeso kahato i'atu'e kat pote sa'a­wy­'ite nagnia tunug niatpo kahato 46 anu pe ta'a­tunug meiũwat Tupana mõtypot yat wato i'atu'e. Aikotã ten pyno etunug kuap mye'ym e'at pe yn i'atu'e.