João 2:14-24

¹⁴Ig danuh atere, ig parak ta agikut ini leglis kewye Uhokri Gipin. Ayge ig hiyá hiyeg batebdebdihpikis igkis piyuknes pak, muttuh, tukwa adahan hiyeg kakanhewne ta git Uhokri. Hawwata ig hiyá hiyeg uniyehkeputnepwi karukri ayge.

¹⁵Ig Kiyapwiye Jesus hiyapni henne, ig kehe pahat tiray akak kuwawta. Ig ipukeprikis madikte payak gikakkis muttuh gikakkis pak. Hawwata ig padakape nerras ku pariye uniyehkeputnepwi gikakurakis. Ig tukuhape gaxtenkis.

¹⁶Ig awna ta gitkis nerras piyuknepwi tukwa. Giwn: ―Iwapapemni madikte aytekihan. Inin payt ini Nighu gipin. Ka yi muwaka keh in humaw pahayku piyukket.

¹⁷Usuh gikannuhnipwi hiyapni henne, usuh kiyé pahat yuwit amadgatak Uhokri gannasan minikweknene. Inakni yuwit awna: “Nah kiyatha Uhokri Gipin mpiynepepye. Nah ka hiyepkere ariknawnama patahwaki parak atere.”

¹⁸Ayteke nerras judeyenepwi giwewkistenkis ayge, igkis awna git Kiyapwiye Jesus: ―Mmahki pis keh ini ku pariye pikehni ay? Kitak pis utí pikumadukan adahan pis keh henne? Asá keh annut wowtrik adahan arekhetni pidatni wothu kahadbe usuh hiyakpi ba pis ayta giwntakwatma Uhokri.

¹⁹Igme kaytwa giwnkis: ―Nah akkite yit pahatwowa annut. Hiyawa yis mehe inin Uhokri Gipin. Adahan mpana hawkri nah kannikasepni akiwnek.

²⁰Igkisme kaytwa giwn: ―Usuh wagahkise inin payt abet kaayhsima kamukri, paxkabu madikwa akebyi akak puguhkunabu arawna (46). Mmah ik adahan pis kannikasin adahan mpana hawkri? Ka ik.

²¹Igkis ka pukuha inakni Kiyapwiye Jesus giwn patuwesbuhka. Bawa ig kinetihwa amin gipit ku pariye inyerwa Uhokri Gipin.

²²Ariwntak ini ku aysaw ig kuwis kannikaw ariw gimiremni, apim ini usuh gikannuhnipwi kiyé inakni giwn. Inneki keh usuh iha madikte Uhokri gannasan minikweknene amin gikankawni. Hawwata apim ini usuh iha madikte Kiyapwiye Jesus giwn amin gikankawni.

²³Ayge Jerusalém abet ini fet adahan kiyene ku samah minikwak Uhokri wiwhkiswiye amekenegben giwakutakkis hiyeg ejituyenepwi, ayge ig Kiyapwiye Jesus keh kaayhsima annut ku pariye hiyeg amadgayapu inin ka hiyá nikehka. Ini annut humaw arekhetni gidatni. Kaayhsima hiyeg hiyapni henne, igkis ihe ku ig Kiyapwiye Jesus igyerwa Uhokri gikanyan adahan ukumaduketniwiy.

²⁴Henneme ig ka kamaxwa ta gipititkis nerras hiyeg awaku ig hiyakni ku hiyeg gihiyakemnikis atekegbetwiye.