João 20:19-31

¹⁹Morarame tykohmãse ahtao nomĩkoae ro tõximõse Jezu poetory tomo tapyi tao. Tapyi eutary tapuruse toto a, juteu tuisary tõ zuno toexirykõke. Morarame Jezu tooehse toto rãnaka. Ynara tykase ynororo eya xine, —Torẽtyke pyra ehtoko, tykase eya xine.

²⁰Morara kaxĩpo tomary tonepose eya xine. Tuotopõpyry roropa tonepose eya xine warata eutahpyry tukumikyhny po tonepose eya xine. Tãtãkyemase toto Jezu eneryke tyya xine.

²¹Morarame ynara tykase ropa Jezu eya xine, —Torẽtyke pyra ehtoko. Morara exiryke jenyohtopõpyry saaro Papa a oenyohtorỹko ase, tykase Jezu eya xine.

²²Morara kaxĩpo pũ tykase ynororo toto pona. Ynara tykase eya xine, —Ritonõpo zuzenu ekarõko ase oya xine. Aomipona ehtoko.

²³Imehnõ rypyry tykorokapose oya xine ahtao, toto rypyry korokãko Ritonõpo mana. Yrome iirypyrykõ onykorokapopyra awahtao xine Ritonõpo a, iirypyryme ro toh mana, tykase Jezu eya xine.

²⁴Toiro Jezu poetory moroto pyra kynexine. Tome pyra kynexine. Kamaramanõpo wãtasẽ pyra kynexine, toto rãnaka Jezu tooehse ahtao.

²⁵Morarame Tome tonese ropa tyya xine ahtao, —Jezu ynaneneno, tykase toh eya repe. Yrome ynara tykase ynororo, —Perẽku eutahpyry enery se ase emary poko. Jemary onẽmara jahtao perẽku eutahpyry aka, warata eutahpyry aka roropa, “Ajohpe,” ãko ase. Onenetupuhpyra ase. Mãpyra jemary tõmase ya ahtao, “Ajohpe pyra ro,” ãko ase, tykase ynororo eya xine.

²⁶Toiro semana taropose ahtao tõximõse ropa Jezu poetory tomo, tapyi tao. Tome roropa toto maro kynexine rahkene. Tapyi tysorotohtose repe. Yrome Jezu tooehse toto rãnaka. Ynara tykase eya xine, —Torẽtyke pyra ehtoko, tykase ropa eya xine Jezu.

²⁷Morarame Tome a ynara tykase ynororo, —Jemary eneko. Oemary tyriko sẽ aka, perẽku eutahpyry aka. Oemary tyriko ukumikyhny aka roropa warata eutahpyry aka. “Ajohpe”, kara exiko jẽsemãtopõpyry ropa poko. Wenetupuhko, tykase Jezu eya.

²⁸—Jesẽ mase. Ritonõpome mase, tykase Tome.

²⁹Ynara tykase Jezu eya, —Wenetupuhnohxo rahke? Osenepõ puh oya rohke. Imeĩpo tãkye kuhse imehnõ exĩko mana jenepyra ro ahtao jenetuputyryke tyya xine, tykase Jezu eya.

³⁰Tuhke rokẽ tyjamitunuru tonepose Jezu a typoetory tõ neneryme. Yrome sero poko onymeropyra ase.

³¹Ynara rokẽ tymerose sero poko ya nase, Jezu enetupuhtohme oya xine Ritonõpo nymenekahpyryme kukurãkanekõme. Morarame Ritonõpo mũkurume enetuputyryhtao orihpyra exĩko matose jũme, katoh rokẽ tymerose ya.