Jesu tondiba tuona 16:23-36

²³Ban den puapua ba boncianla, bi den kuani ba li kadidieli nni ki mia li kadidieli guudikoa wan ya gu ba bonhanla.

²⁴O guudikoa n den gbadi laa maama, o den kuani ba li kadidieli tugu nni ki kpa bi taana ti kpaadi.

²⁵Lan den bua ki pundi ki yagisiigu, Polo leni Silasa den jaandi ki yiini ki pagi U Tienu, ke a kadibila cengi.

²⁶Lanyogunu lanyogunu mi tindigibicianma den tieni hali ke li kadidieli tanpuuna kuli den begibi. Yaa kuesesli n den luo a kadibila kuli den lodi.

²⁷Li kadidieli guudikoa den fundi. Wan den la ke li kadidieli bulioana kuli ya, o den tama ke a kadibila kuli sani, ke o noadi o jugisiega ki baa kpa o yuli.

²⁸Ama Polo den tiani ki yedi: Da tieni a yuli liba kelima tikuli ye ne.

²⁹O guudikoa yeni den teni bi cuoni opo ki fidisanga ke o sani ki kua Polo leni Silasa n ye naankani ki jie hali ki digibi, ki gbaani bi nintuali.

³⁰O den ani ba niinpo ki yedi ba: N danba n baa tien be ki tindi?

³¹Bi den yedi o: Daani o Diedo Jesu a baa tindi, fini leni a diegu nni yaaba kuli.

³²Lani bi den waani o o Diedo laabaalimo, wani leni yaaba den ye o deni kuli.

³³Lanyogunu, ku iagu yeni liga, o den gedini ba ki huudi bi sinala.

³⁴O den kuani ba o dieli nni ki puni ba mi jiema. Wani leni o deni yaaba kuli pala dn mangi hali boncianla kelima bi den tuo ki daani U Tienu.

³⁵Lan den yendi, bi yudancianba den soani a minteela yudaano li kadidieli guudikoa kani ki yedi o: Faabi bi jaba yeni.

³⁶O den togidi laa maama Polo ki yedi o: Bi yudancianba soani ke min faabi yi. Lanwani yin fi ki a ki gedi leni mi yanduanma.