Jesos Odanodaganan Odijitcige8ini8an 2:7-30

⁷Coda8innig ki kitci mamakadendamog, midac ki ikido8ag: “Igi8e a8iagog ka aianim8e8adj, kana kakina Galilee akig odjisidog8enag?

⁸Adi dac pekic kakina pepejig oo ka taciak 8edji noda8aiakonig e ijigij8e8adj maia ejigij8eiak.

⁹Nandam kina8it ka taciak Panit (Parthes) akikag odji8ag, nandam Midia (Médie), Elam, Mesopotamia, Coda (Judée), Kapados (Cappadoce), Ponit, Eja (Asie),

¹⁰Parijia (Phrygie), Pampilia (Pamphylie), Idjip (Égypte), acitc Libia (Libye) akikag pecodj Sinen (Cyrène). Rom ka odji8adj a8iagog te8ag,

¹¹nandam e Coda8inni8i8adj acitc nandam a8iagog kagi adjito8adj odaiamie8ini8a kidji gi Coda8inni8i8adj. Nandam Kanet (Crète) acitc Arabi (Arabie) odji8ag. Misa8adj dac pepejig ka taciak, kinoda8ananag maia tabickotc ka ijigij8eiak, e tibadjimo8adj adi ka kitci ijitcigendjin Kije Manidon,” ki ikido8ag.

¹²Kakina dac kitci mamakadendamobanig acitc ka8in okikendasina8aban adi ke inendamo8adj. K8ag8edjimidibanig: “Adi dac ii 8a ikidomagag?”

¹³Kodagiag dac 8in opapia8abanin ka teb8etamindjin acitc odina8abanin: “Aja maiagotc ki8ack8ebi8ag igi!”

¹⁴Pien acitc kodagiag ka midatcin acitc pejigo8adj Anodaganag ki pazig8i8ag acitc Pien ki kitci kiji8e e anim8edj: “Kina8a ni8idji Coda8innimag, acitc kakina Jerusalemikag ka tajikeieg! Ndotamok oo ke ikido8an acitc k8ag8e nisidotamok adi 8a ikidomagag oo8e ka 8i 8idamonagok.

¹⁵Igi8e a8iagog ka8in ki8ack8ebisi8ag, ii ka inenimeg8a. Motci cagidasotibaiganea e kijeba8agag!

¹⁶Tiegodj, mi aja ijise nogom adi niganadjimo8inni Joel kagi ojibiigepan:

¹⁷‘Kije Manido ikido: 8adan oo ke iji8ebag apitc ani ponaki8ag. Mino Manidon niga minag kakina a8iagog. Kig8izisi8ag acitc kidanisi8ag kada tibadjimo8ag nidikido8ini. Kidockinigimi8ag kada ijinamog. Kikitci anicinabemi8ag kada inabadamog.

¹⁸Teb8e ii apitc kakina ka anokitaoji8adj niga minag Mino Manidon, nabeg acitc ik8e8ag. Kakina dac kada tibadjimo8ag nidikido8ini.

¹⁹Niga ojitonan e kitci mamada8izimagagin kegonan icpimig 8ak8ikag acitc ooma akikag. Misk8i acitc ickode kada 8abadjigade8an acitc kada kitci packine.

²⁰Kizis kada poni tcakasige. Tibikikizis kada miskozi, mi maia misk8i ke ijinagozidj. Mi ke iji8ebag ab8amaci odjitcisenig ka Tibendjigedj okijigom ka kitci apitendag8anig acitc ka kitci icpendag8anig.

²¹Midac a8iagigotc ke nd8e8emadjin ka Tibendjigendjin kidji pi nda 8idjiigodjin, aa a8iag kada ag8acimagani8i.’ Mi ka ikidodj niganadjimo8inni Joel.”

²²“Israel a8iagog! Ndotamok adi ke iji 8idamonagok! Kiga mikodamonom Jesos, Nazaret odenag kagi odjidj. Kije Manido 8e8enda kigi 8abadaigo8a kagi onabamadjin Jesosan, e abadjiadjin kidji mamada ijitcigendjin acitc ka mamakazinag8anigin kegoni kidji todamindjin. Aja dac kikikendana8a oo8e, egi 8abadameg adi ka todag ooma kidaki8akag.

²³Kije Manido, e nigani kikendamogobanen ke iji8ebanig, aja ki inendamogoban kidji pagidinamago8eg Jesosan. Kigi nisa8a, egi pagidineg8a a8iagog ega ka teb8eta8a8adjin Kije Manidon kidji acidak8a8a8adjin tcibaiatigokag.

²⁴Kije Manido dac ogi abidjibaan. Ogi kibitinama8an adi eji kodagitonipanin apitc ka nibondjin. Ka8in mega pabajine ijinag8asiniban kidji taji midjiminigodj nibo8ini.

²⁵Mamidonendamok David 8eckadj kagi ikidogobanen e mikomadjin Jesosan: ‘Nikikenima apanigotc e pec8abamag ka Tibendjigedj. Opimena ninikag te. Ka8in dac a8iag nigagi cagodjiigosi.

²⁶Midac 8edji mina8azian, acitc 8edji 8idamageian adi epitci modjigendaman. Nidan8ecimonan, 8inikag e iji apacenimo8an.

²⁷Kin mega, Kije Manido, ka8in kiga iji pagidji8ebinijisi ka iji te8adj kagi nibo8adj. Ka8in kiga pagidinasi aa8e ka kitcit8a8izidj ka tibenimadj kidji taji nici8anadanig o8ia8 iima nibo8inikag.

²⁸Kikikendamonijinan adi ke ijaian pimadizi8in kidji mikaman. Apitc 8idjiojian niga kitci modjigendan.’ Mi ka ikidodj David 8eckadj.”

²⁹“Nidjiki8eg! Nikackiton 8e8enda kidji mikomag 8eckadj kikitci anicinabeminaban David. Ki nibo, ki naatcigadeni o8ia8 acitc o8ibabikinigan mi ooma kiabadj nogom e tag8anig.

³⁰David ogi nigani 8abadan adi ke iji8ebanig, midac ogi mikoman kidji abidjibandjin ini8e Kije Manidon kagi ikidonipanin kidji pidjinija8andjin apitc ka ikidodj: ‘Ka8in odji pagidji8ebinagani8isi ka nibondjin ka iji tendjin. Ka8in odji pagidinigadesini kidji taji nici8anadanig o8ia8 iima nibo8inikag.’ Aa mega David niganadjimo8inni8iban acitc okikendanaban Kije Manidon 8e8enda egi 8idamagodjin pejig odanike ojisan kidji pi abindjin ke8in kidji ogima8indjin taji ka iji ogima8ipan.”