Jesos Odanodaganan Odijitcige8ini8an 17:24-33

²⁴Mi 8aa Kije Manido kagi kijendag akini acitc kakina kegoni ooma ka tag8anig. Mi 8aa ka Tibendagin 8ak8ig acitc akini. Ka8in tajikesi aiamiemigi8amikag a8iagon kagi ojitondjin.

²⁵Mi 8aa ka minadjin a8iagon pimadizi8ini acitc kakina kodag kegoni. Ka8in dac mamakadj onada8enimasi8an a8iagon kidji 8idokagodjin. Ka8in mega kegoni nodesesi.

²⁶Kije Manido ogi kijeniman kakina a8iagon. Nitam ogi kijeniman pejig naben, Adam ka ijinikazonigobanen, midac 8inikag ka iji odjindjin kakinagotc enakanezindjin a8iagon. Ogi minan 8akidakamig kidji tajikendjin. Ogi nigani onendan maia anapitc ke pimadizindjin kakinagotc enakanezindjin a8iagon acitc adi ke iji tajikendjin.

²⁷Onada8enimabanin mega kidji kikenimigodjin. Kicpin dac odji nanada 8abamigodjin, ne8ad ogagi mikagon. Ka8in dac misa8adj na8inagozisi pepejig kina8itinakag.

²⁸Ikidonani8an: ‘8in sa kagi kijenimigo8ak, kagi minigo8ak kidji pimadiziak acitc kidji tajikeiak ooma.’ Nandam e tacieg ka nigamo8adj ikido8ag: ‘Mi kekina8it odabinodjijiman kidijinagozimin.’

²⁹Kina8it mada Kije Manido odabinodjijiman kidijinagozimin. Ka8in dac kida inenimasi8anan Kije Manido mi tabickotc manidokan e ijinagozidj, ka oza8iconia8idj kek8an ka 8abiskabikizidj conia kek8an kiabadj ka asini8idj, a8iagog kagi ojia8agobanen, kagi iji midonendamo8adj egi ijia8adjin.

³⁰8eckadj ako, ka8in onigodinendasinagoban Kije Manido ega e kitci kikenimagani8igobanen, aja dac nogom onada8eniman kakina a8iagon kidji an8endizondjin.

³¹Aja mega ogi onendan anapitc k8aiak ke tibakonadjin kakina a8iagon. Ogi onabaman pejig naben, mi ini Og8izisan, kidji tibakonigendjin. Kakina kigi kikendamonigonan teb8e ke iji8ebanig, egi abidjibaadjin ini kagi onabamadjin.” Mi ka ikidodj Pon.

³²Apitc igi8e a8iagog ka noda8a8adjin Ponan e mikomandjin Jesosan egi abidjibaagani8indjin, nandam ogi papia8an. Kodagiag dac a8iagog ki ikido8ag: “Nigodin mina8adj ninada8endananan kidji nodamag kitibadjimo8in.”

³³Midac Pon ka iji naganadjin ka iji ma8adjiidindjin.