Jesos Odanodaganan Odijitcige8ini8an 12:1-20

¹Meg8adj ii apitc, Herod kitci ogima8iban. Ki anokiban dac kidji nanekadjiagani8indjin nandam ka teb8etamindjin.

²Ki anokiban kidji nisagani8indjin Jakan, John o8idjiki8en, e pajiba8agani8indjin.

³Apitc ka kikendag Coda8innin e min8endamiadjin, Jakan egi nisagani8indjin, acitc ki anokigoban kidji takonagani8indjin Pienan. Ii dac apitc, meg8adj Coda8inni Kitci Magocani8anoban, apitc e am8a8agobanen pak8ejiganan ega ka obicinindjin.

⁴Apitc ka ick8a takonadjin Pienan, ogi kiba8an. Ki anokigoban dac ni8inanaj kidji neni8indjin ini8e cimaganican aiackodj ke nagadjiandjin. Herod dac odinendanaban kidji tibakonadjin Pienan nigan a8iagokag apitc ick8a Coda8inni Kitci Magocani8anig.

⁵Pien dac ki kana8enimagani8i kibaodimigi8amikag. Ka teb8etamo8adj dac ogi kitci aiamita8a8an Kije Manidon Pienan odji.

⁶Ii dac e tibikanig, 8iabanig Herodan kidji tibakonigodjin nigan a8iagokag, Pien nibagoban nasa8idj nijin cimaganican. Mag8apizogoban nijin pi8abiko sagapizoneabin e abadanigin, acitc nandam cimaganicag okana8endana8agoban kibaodimigi8ami ick8ademini.

⁷Kitata ka Tibendjigedj pejig odajeniman ki nagozi8an, acitc ki kitci 8asakone iima kibaodimigi8amikag. 8aa ajeni ogi kockobinan kidji 8anickandjin Pienan acitc ogi inan: “8ibadj, pazig8in!” Teci8ag dac ki abiskoseni8an onidjin.

⁸Midac 8aa ajeni ki ikido: “Pizikao kikitcipizon acitc pitakizinen.” Apitc ka ick8atadj, ajenin ogi igon mina8adj: “Pisikan kipizika8agan, nosoneocin dac.”

⁹Pien dac ogi nosone8an ajenin pinici ag8adjik kibaodimigi8amikag. Ka8in dac ododji kikendasin kicpin maia eji8ebanigobanen, “nidijinanadok eta” ki inendamogoban.

¹⁰Apitc dac ka ick8a cabockamo8adj nitam ick8ademini ka kana8endjigadenig, mina8adj eko nijinigin ogi oditana8a, acitc dac ki ani ija8ag pi8abiko ick8ademikag, ick8eag ick8adem ag8adjik kidji gi te8adj. Ii dac ick8ademini ceck8atigotc 8edji cesenig, midac ka iji sagaamo8adj kibaodimigi8amikag. Ki ani ija8ag pejig odena mikanajicini. Kitci kaiezigotc dac Pien ogi naganigon ajenin.

¹¹Pien dac ogi odji pabiziskendan adi ka iji8ebanig. Ki ikido: “Nogom aja nikikendan teb8e egi iji8ebag. Ka Tibendjigedj ogi pidjinija8an odajeniman, kidji 8idjiijindjin e ojimo8an. Ka8in dac aja nogom Herod nigagi manenimigosi, acitc ka8in odji pejig oga kackitosina8a Coda8innig kakinagotc ka 8i iji todaoji8apan.”

¹²Apitc ka nisidotag Kije Manidon egi pidjinijaamagodjin ajenin kidji 8idjiigodjin, Pien ki ija Manin omigi8aminikag. John odjodjombanin aa Mani, Mak (Marc) dac acitc ijinikanagani8igoban aa John. Mane8agoban iima e taji aiamie8adj.

¹³Apitc Pien ka papa8aag ick8ademini, pejig anodaganik8e ki pija ick8ademikag, Roda (Rhode) ijinikazogoban.

¹⁴Ogi nisidotan Pienan e aiaa8indjin apitc ka noda8adjin. E apitci min8endag dac, aa anodaganik8e ki 8anike kidji cenag ick8ademini. Ki ipato ka iji aiamiani8anig, midac ki ikido: “Pien ooma te ick8ademikag!”

¹⁵Ki inagani8i: “Kiki8ack8enadok!” Kiabadj aa ik8e ogi inan Pienan iima e tendjin ick8ademikag. Midac ki nak8e8ajiagani8i: “Odajenimidog8enan ini!”

¹⁶Pien kiabadj ogi papa8aan ick8ademini. Apitc ka cenamo8adj ick8ademini, ogi nisida8ina8a8an Pienan acitc ki kitci mamakadendamog.

¹⁷Pien dac pekadjig ogi inan onidji e abadjitodj. Ogi tibadjimota8an adi Kije Manidon ka iji 8idjiigodjin kidji kackiodj kibaodimigi8amikag. Ogi inan: “8idamaokog Jak (Jacques) acitc kodagiag ka teb8etamo8adj adi ka iji8ebag.” Midac ka iji madjadj pakan.

¹⁸8iabanig, ki kitci animendamo8agoban ka nagadjito8adj kibaodimigi8amini acitc k8ag8edjimidi8agoban adi Pienan ka ijanigobanen.

¹⁹Kitci ogima Herod ki anoki kidji nanada 8abamagani8indjin Pienan, ka8in dac odji mikaomagani8isi8an. Ki anoki acitc kidji k8ag8edjimagani8indjin ini8e ka kana8endamindjin ick8ademini kibaodimigi8amikag adi ka iji8ebanigiban, midac ki ikido kidji nisimagani8indjin. Ick8a dac ii, kitci ogima Herod ki odji madja Coda (Judée) akikag, kidji nda tajikedj 8edi Sesani (Césarée) odenag.

²⁰Herod ogi kitci kiji8aigon kakina a8iagon ka tajikendjin 8edi Tir (Tyr) acitc Sidon odenan. Midac igi8e ka tajike8adj iima odenan ma8asag ogi pi nda 8abama8an Herodan. Ab8amaci ija8adj, ogi cagozoma8an pejig naben, Blastos ijinikazonigobanin, kidji 8idjiigo8adjin e nda aiamia8adjin ogiman. 8in mega kitci niganizigoban e anokitagedj ogiman omigi8aminikag. Ma8asag dac ogi nda pagosenima8an Herodan ega kidji pamenimigo8adjin, mi mega iima Herod odakikag 8edinamo8adj omidjimimi8a.