Jesaja 1:9-26

⁹Anutu Tâpiri Ɋuŋɋasaŋ Wofuŋzi ʒikare uucne moc mi akic‐jopa‐nâreme muzac, ine Sodom iŋucne enʒapeŋ, â Gomorare sâc bâfuanʒapeŋ.

¹⁰Sodomte micne ŋoŋe Wofuŋte dâŋ mananiŋ! Gomora ŋic ŋoŋe Anutu‐nâŋecte mumutâc dâŋ irec hazec râeniŋ.

¹¹Wofuŋ e ʒiŋuc mukac: “Taha wiac‐ŋeŋic guru sâko izi wemo enareocmu? Lama ŋicne bâzi rike‐nareeŋgopieŋ irec mecne â bulimakao biuc sâko jaŋere wokemaŋte mâmâc takicnukac. Erâ bulimakao ŋicnere socte me lamare me noniŋ ŋicnere wâc mi aŋacnukac.

¹²“Ŋoŋe mai enareniŋte fisieŋgopieŋko hae ʒoŋa‐nane âtenʒaŋneniŋte mozi muŋarewec?

¹³Taha fârimâc mocwâc mi bafisiniŋ, hosâc âsure mamakâcnukac, mosa ɋârire hombaŋ â sabata hombaŋ â tutumaŋte ʒâfo bapamanaŋgopieŋ, hehesic juju â hombaŋ tutumaŋ, i bâturepie ââkeacnukac.

¹⁴Mosa ɋâri‐ŋeŋic â hombaŋ tutumaŋ‐ŋeŋic i maŋnanezi qaisockeekac, iŋeŋiczi hâcne kimâcnuha mana ʒâireekopac.

¹⁵Ŋoŋe meŋeŋic bâfeŋne‐narepie ʒâŋe‐nane bâsoŋke‐ŋarepemu; eme nunumu bocjaha numupie no sifu hazec mi râepemu; meŋeŋic soc ruacne‐fârekicne i!

¹⁶Maŋsahac‐ŋeŋic ʒure ɋaɋackeniŋ; eebapa‐ŋeŋic sâqocne fokac i ʒâŋe‐naneonec bârârieniŋ, ehuc sâqocne beheniŋ.

¹⁷Eehâmore aafec gie baniŋ; bâbâtiŋ fua sanaŋkeocte henʒiriŋneniŋ, ŋic pepec eejare fuakac i bâtiŋneniŋ; bekâ mâsiŋ dâŋjeŋic dopeckeniŋ, hozec sacfozic fojareniŋ.”

¹⁸Wofuŋzi mukac: “Ajoc, warepie dâŋ mu bâtikic enaŋ: Hehesic‐ŋeŋic saŋ bâroŋ iŋucne fokacko sifu sinou iŋucne qaŋqaŋ fuazejec: â qoruc somboroŋ iŋucne fokacko sifu lama kanʒaŋ iŋucne fuazejec.

¹⁹Ŋoŋe aafec bâfuarâ micrereŋhec eniŋmuo mâreŋte fâri biaŋ fua‐ŋareme nâniŋmu.

²⁰Â qikiŋnehuc râŋgeŋkeniŋmuo ine ʒikazi kimiziec‐ŋopaocmu. Dâŋ i Wofuŋte mickonec wahakac hâcne.”

²¹Ojai, hae pectâc biaŋ juwicnao bâbâtiŋte neŋgocne ŋeweczi weniŋuc erâ boe saure hozine ekac! Mârâc tiŋne jujure ŋeŋe hae eweczi miŋecgac ʒika qaqare ŋeŋe hae ekac.

²²Siliwagezi ŋetikierâ qânâ tinac ewec, waiŋge i opâhec bâsifuckekicne.

²³Micnefâcge jaŋe doc bapa ŋic erâ fiuc roro ŋic jaŋere âgofâc embiŋ. Jaŋe sasawa bâbâmiriŋ moneŋte ejareme bubiaŋ wiac roniŋte ra rowec ware rowec eeŋgopieŋ. Jaŋe bekâ mâsiŋ dâŋgieo mi ŋezic‐jopaeŋgopieŋ â hozec jaŋere dâŋ jaŋerao mi fisiekac.

²⁴Irec Fekicne sâko, Anutu Tâpiri Ɋuŋɋasaŋ Wofuŋ, Israere Anutu tâpiri rune, ere micdâŋ ʒiŋuc fuakac: “No kisâfâc‐nane okacne bazu‐jarepemu â kimbeŋ‐nanezi râsifâc‐nane rua‐jarerâ maŋnane mâteŋkeocmu.

²⁵No menane goraopec bâfeŋnepemu, erâ siliwa jawage opâ ʒaʒacnezi ʒure‐garepe fârine wosâeme jawa bârâriepemu.

²⁶Eme mumutara ŋicfâcge esecne jugarembiŋ, iŋucne mocwâc bâfuac‐jopa‐garepemu, â mumutâc ŋic bâbâni jumbiŋ iŋucne; eme faicnao ʒâŋege tiŋne juju â jauŋ fâri hae mugareniŋmu.”