Jesaja 1:1-14

¹Ʒi Amozire ŋokâ Jesaja e ʒâŋene raruŋkeme Juda mâreŋte â Jerusalem haere wiac hone manac ewec irec dâŋ. Ine Uʒija, Jotam, Ahaʒi â Hisikia jaŋe Juda ŋicwofuŋ juwarehuc juhapie wiac i fuacnehuc juwec.

²Sambâŋne sambâŋne ŋoŋe mananiŋ, â mâreŋ go hazec râec; Wofuŋ e ʒiŋuc mukac: “No naru motec gume bâsokac ejarehuc hone maiŋ ejarepo, eme jaŋe ine fenarembiŋ.

³Bulimakao e ruticne ʒâŋitaekac, â doŋgi e bomboŋ‐ticnezi nânâ oto bâfuacnewec i manaekac; Israe e ine mamana mi focnekac, ŋicfâc‐nane jaŋe maŋ tâmiric juŋgopieŋ.”

⁴Jei, ŋicguru sindaŋ hârindaŋne, kiŋ bahac qâŋkerâ juju, sâqocne bapa jaŋere ɋâricfâc, naru motec kekeporicne. Jaŋe Wofuŋ râpeckembiŋ, Israere Tiri Wofuŋ mana suambiŋ, ehuc e beherâ rârâpe wisembiŋ.

⁵Ŋoŋe fecnehuc jaha juŋgopieŋte wemo‐ŋeŋicko ʒuhuckerâ qa bâtiŋ eŋarezo? Qizec e furu jaha huc ecnekac, maŋ e furu jaha betaŋkekac.

⁶Kike tape â qizec botâŋ ŋoŋondeŋ‐jekicko sahac moc furu mi fokac; qa hepârâc ekicne â ʒikare micrâfâc â wic soc sâŋiŋnehec sasawa; i ba bâpisic â ʒure foŋ mi ecnekicne, â wokemaŋ ruacnehuc mi bâuruekicne.

⁷Mâreŋ‐ŋeŋic tuhu fuawec fokac, hae sâko‐ŋeŋic ŋerawec i ʒoczi ʒâseŋkewec; mâreŋ‐ŋeŋicte fârine i ŋic furunezi ʒâŋe fai‐ŋeŋicko ro nâc eeŋgopieŋ, hae mâreŋ i jabanezi qa imac embiŋ iŋucnea fokac.

⁸Eme waiŋ gieo boze wamba ŋeekac, Zioŋte otâ e irec sâc mac behepie ŋekac; wâruhaŋ maŋko gie boze ŋeekac irec sâc, me hae moc somâmaŋko ŋeekac iŋucne.

⁹Anutu Tâpiri Ɋuŋɋasaŋ Wofuŋzi ʒikare uucne moc mi akic‐jopa‐nâreme muzac, ine Sodom iŋucne enʒapeŋ, â Gomorare sâc bâfuanʒapeŋ.

¹⁰Sodomte micne ŋoŋe Wofuŋte dâŋ mananiŋ! Gomora ŋic ŋoŋe Anutu‐nâŋecte mumutâc dâŋ irec hazec râeniŋ.

¹¹Wofuŋ e ʒiŋuc mukac: “Taha wiac‐ŋeŋic guru sâko izi wemo enareocmu? Lama ŋicne bâzi rike‐nareeŋgopieŋ irec mecne â bulimakao biuc sâko jaŋere wokemaŋte mâmâc takicnukac. Erâ bulimakao ŋicnere socte me lamare me noniŋ ŋicnere wâc mi aŋacnukac.

¹²“Ŋoŋe mai enareniŋte fisieŋgopieŋko hae ʒoŋa‐nane âtenʒaŋneniŋte mozi muŋarewec?

¹³Taha fârimâc mocwâc mi bafisiniŋ, hosâc âsure mamakâcnukac, mosa ɋârire hombaŋ â sabata hombaŋ â tutumaŋte ʒâfo bapamanaŋgopieŋ, hehesic juju â hombaŋ tutumaŋ, i bâturepie ââkeacnukac.

¹⁴Mosa ɋâri‐ŋeŋic â hombaŋ tutumaŋ‐ŋeŋic i maŋnanezi qaisockeekac, iŋeŋiczi hâcne kimâcnuha mana ʒâireekopac.