Jesaja 10:19-29

¹⁹Ekume jâckâte‐jeŋicte tiwâne jahec mac domaocmu, ʒarene motec piticne moczi wose qâreŋ eene.

²⁰Dameŋ ira Israe ŋic tiwâne â Jakobore kikefuŋ nâfocne jaŋe imac‐jopawec erao mocwâc mi roweckeniŋmu; mâcne, jaŋe Wofuŋ, Israere Tiri rune erao jâmbomacko roweckeniŋmu.

²¹Tiwânezi risieniŋmu, Jakobore tiwânezi momori Anutu erao risieniŋmu.

²²Israe ŋicguruge hâwecte moŋgeŋ iŋucne sawe‐bipieniŋmuo sifu tiwâne sawa risieniŋmu. Ima bâroŋ mupaŋkekicne izi bâbâtiŋhec opâ rumi iŋucne fisiocmu.

²³Wofuŋ, Anutu Tâpiri Ɋuŋɋasaŋ Wofuŋ, eki mâreŋ sasawa ira ima bâroŋ fuaocte mupaŋkewec irec sâcko bâfuaocmu.

²⁴Irec Wofuŋ, Anutu Tâpiri Ɋuŋɋasaŋ Wofuŋ, e ʒiŋuc mukac: “O ŋicfâc‐nane, Zioŋko juŋgopieŋ, mârâc Aigita jaŋe ɋaruczi ŋopahuc kâcbiŋ fotarie‐ŋarembiŋ irec sâc Asiria ŋic jaŋe eŋarehapie mi hâwic‐ŋopazejec.

²⁵Dameŋ bembeŋne mac tarame kimbeŋ‐nane omaeocmu, eme aaric‐nanezi jaŋe bâsirowec‐jopaocte fahareocmu.

²⁶Anutu Tâpiri Ɋuŋɋasaŋ Wofuŋzi ʒika fotarie‐jareocmu, Midiaŋ ŋic Orebe qânâo jopawec iŋuc; erâ gunu‐ticne hâwecko sicneocmu i Aigita ŋic ejarewec iŋuc eocmu.

²⁷Eme dameŋ ira Asiriare mafa ɋawegaonec ŋetara wahaocmu â tagi‐ticne upefuŋgaonec rârieocmu.”

²⁸Râsi jaŋe Rimoŋ haeonec faharerâ Ajata haeo fisiŋgopieŋ, Migiroŋ hae jâururâ mafa‐jeŋic Mikimasi haeo guruckeŋgopieŋ.

²⁹Qaqahasicnao fotâcnerâ Geba haeo ŋafeme fombiŋ. Rama hae rune ɋarac ɋarac qaŋgopieŋ, Saulore Gibea irec rune wiseŋgopieŋ.