Text copied!
CopyCompare
Kâte Bible - Jesaja - Jesaja 10

Jesaja 10:16-33

Help us?
Click on verse(s) to share them!
16Irec Wofuŋ, Anutu Tâpiri Ɋuŋɋasaŋ Wofuŋ, e Asiria momori biuc sâkohec jaŋe hucsanaŋ sore‐jareocmu, â eri qaraweŋ‐jeŋic turuŋkeme bâruŋkerâ ʒoc iŋucne ʒaocmu.
17Israe ere tatamac izi hâcne ʒoc eocmu, Tiriŋic‐ticne eki ʒocbâruŋ eocmu; erâ fâpâ uupic â sopâc‐jeŋic i ʒoaŋ mocjahao ʒarâ ʒâseŋkeocmu.
18Eme jâckâte â jufu‐jeŋicte eri biaŋ i Wofuŋzi bâsiroweme fuŋgâtânehec omaeocmu, hucŋic moczi fofeku mâc omaeekac irec sâc.
19Ekume jâckâte‐jeŋicte tiwâne jahec mac domaocmu, ʒarene motec piticne moczi wose qâreŋ eene.
20Dameŋ ira Israe ŋic tiwâne â Jakobore kikefuŋ nâfocne jaŋe imac‐jopawec erao mocwâc mi roweckeniŋmu; mâcne, jaŋe Wofuŋ, Israere Tiri rune erao jâmbomacko roweckeniŋmu.
21Tiwânezi risieniŋmu, Jakobore tiwânezi momori Anutu erao risieniŋmu.
22Israe ŋicguruge hâwecte moŋgeŋ iŋucne sawe‐bipieniŋmuo sifu tiwâne sawa risieniŋmu. Ima bâroŋ mupaŋkekicne izi bâbâtiŋhec opâ rumi iŋucne fisiocmu.
23Wofuŋ, Anutu Tâpiri Ɋuŋɋasaŋ Wofuŋ, eki mâreŋ sasawa ira ima bâroŋ fuaocte mupaŋkewec irec sâcko bâfuaocmu.
24Irec Wofuŋ, Anutu Tâpiri Ɋuŋɋasaŋ Wofuŋ, e ʒiŋuc mukac: “O ŋicfâc‐nane, Zioŋko juŋgopieŋ, mârâc Aigita jaŋe ɋaruczi ŋopahuc kâcbiŋ fotarie‐ŋarembiŋ irec sâc Asiria ŋic jaŋe eŋarehapie mi hâwic‐ŋopazejec.
25Dameŋ bembeŋne mac tarame kimbeŋ‐nane omaeocmu, eme aaric‐nanezi jaŋe bâsirowec‐jopaocte fahareocmu.
26Anutu Tâpiri Ɋuŋɋasaŋ Wofuŋzi ʒika fotarie‐jareocmu, Midiaŋ ŋic Orebe qânâo jopawec iŋuc; erâ gunu‐ticne hâwecko sicneocmu i Aigita ŋic ejarewec iŋuc eocmu.
27Eme dameŋ ira Asiriare mafa ɋawegaonec ŋetara wahaocmu â tagi‐ticne upefuŋgaonec rârieocmu.”
28Râsi jaŋe Rimoŋ haeonec faharerâ Ajata haeo fisiŋgopieŋ, Migiroŋ hae jâururâ mafa‐jeŋic Mikimasi haeo guruckeŋgopieŋ.
29Qaqahasicnao fotâcnerâ Geba haeo ŋafeme fombiŋ. Rama hae rune ɋarac ɋarac qaŋgopieŋ, Saulore Gibea irec rune wiseŋgopieŋ.
30Galim haeru owa ruruckeniŋ! Laisa ŋic ŋoŋe hazec râeniŋ! Anatoti rune ŋoŋe micjeŋicko roniŋ!
31Madamena jaŋe tâtieŋgopieŋ, Gebim rune wise tâmireŋgopieŋ.
32Miŋec ʒoaŋ Noboo fisirâ hae i sakareniŋmu; biac Zioŋ ŋecjucfâcne jaŋere tiki, Jerusalem tiki hâcne, i mejeŋic wickehuc ackeniŋmu.
33Manakic, Wofuŋ, Anutu Tâpiri Ɋuŋɋasaŋ Wofuŋ, e ɋicwânʒâŋhec ehuc jâc botâŋne fackeocmu, â ʒorarâ fekicne qafarac‐jopaocmu, ehuc fefec sisiric ekicne jaŋe bâuruŋ‐jopaocmu.

Read Jesaja 10Jesaja 10
Compare Jesaja 10:16-33Jesaja 10:16-33