JAN 9:3-24

³O Ježiš odphenďa: “Aňi ov na kerďa binos aňi leskeri daj the dad. Ale kada pes ačhiľa vašoda, hoj pes pre leste te sikavel le Devleskeri zor.

⁴Me mušinav te kerel o skutki oleskere, savo man bičhaďa, medik hin o džives. Avel e rat a akor našťi kerela ňiko skutki.

⁵Medik som pro svetos, som o svetlos le svetoske.”

⁶Sar oda phenďa, čhungarďa pre phuv, kerďa le šlinenca čhik a pomakhľa o jakha le koreske.

⁷A phenďa leske: “Dža, thov (omor) tut andro paňi Siloam” (so hin prethodo: Bičhado). Avke geľa a thoďa pes, avľa pale a dikhelas.

⁸Akor phende leskere susedi the ola, save les angloda dikhenas te žobrinel: “Či oda nane ov, savo bešelas a žobrinelas?”

⁹Jekh phenenas: “Oda hin ov.” Aver phenenas: “Nane, ale dičhol sar ov.” Ale ov phenelas: “Oda som me.”

¹⁰Akor lestar phučle: “Sar tuke phundrile o jakha?”

¹¹Ov odphenďa: “O manuš, savo pes vičinel Ježiš, kerďa čhik, pomakhľa mire jakha a phenďa mange: ‘Dža ko paňi Siloam a thov tut!’ Avke geľom, a sar man thoďom, chudľom te dikhel.”

¹²Akor leske phende: “Kaj hino oda manuš?” Phenďa: “Na džanav.”

¹³Paľis ľigende oles, savo sas koro, ko Farizeja.

¹⁴Oda džives, sar kerďa o Ježiš e čhik a phundraďa leskere jakha, sas Šabbat (sombat).

¹⁵O Farizeja lestar pale phučle: “Sar chudľal te dikhel?” Ov lenge phenďa: “Thoďa čhik pre mire jakha, thoďom (morďom) man a chudľom te dikhel.”

¹⁶Akor phende varesave Farizeja: “Kada manuš nane le Devlestar, bo na doľikerel o Šabbat!” Aver phenenas: “Sar šaj kerel binošno manuš kajse zazraki?” A vesekedinenas pes maškar peste.

¹⁷Avke pale phende le koreske: “Tu, so phenes akana pal leste, sar tuke phundraďa o jakha?” Ov phenďa: “Hino prorokos.”

¹⁸O Židi na pačanas, hoj sas koro a chudľa te dikhel, medik peske na vičinde leskera da the dades.

¹⁹Avke lendar phučle: “Hin kada tumaro čhavo? Pal leste phenen, hoj uľiľa koro? Sar oda, hoj akana dikhel?”

²⁰Leskeri daj the o dad lenge odphende: “Džanas, hoj hin amaro čhavo a džanas, hoj uľiľa koro,

²¹ale sar oda, hoj akana dikhel, na džanas. Amen na džanas, ko phundraďa leskere jakha. Hin leske o berša, phučen lestar; ov vakerela korkoro vaš peste.”

²²Kada phenďa leskeri daj the o dad, bo daranas pes le Židendar. Bo o Židi pes maškar peste dovakerde, hoj oda, ko pre leste phenela, hoj hino o Kristus, ela avričhido andral e sinagoga.

²³Vašoda phenďa leskeri daj the dad: “Hin leske o berša, lestar phučen.”

²⁴Akor vičinde o Farizeja dujtovar ole manušes, savo sas koro, a phende leske: “Vaker čačipen anglo Del. Amen džanas, hoj oda manuš hino binošno.”