Text copied!
CopyCompare
Le Devleskero Lav Andre Romaňi Čhib 2019 - JAN - JAN 7

JAN 7:7-40

Help us?
Click on verse(s) to share them!
7Pre tumende o svetos na džal, ale man našťi avri ačhel, bo me pre leste phenav avri, hoj namištes kerel.
8Tumen džan andro Jeruzalem pro inepos. Me na džav pre kada inepos, bo mek na avľa miri ora.”
9Kada lenge phenďa a ačhiľa andre Galileja.
10Ale sar odgele leskere phrala pro inepos, odgeľa the ov – no na avke, hoj les te dičhol, ale počoral.
11O Židi les rodenas pro inepos a phenenas: “Kaj hino koda?”
12A maškar o nipi pes pal leste but vakerelas. Jekh vakerenas, hoj hino lačho, a aver vakerenas, hoj cirdel le nipen pal peste le klamišagoha.
13Ale ňiko pal leste na vakerelas anglal o nipi, bo daranas pes le Židendar.
14Sar imar pregeľa jepaš inepos, odgeľa o Ježiš upre andro chramos a sikavelas.
15Akor pes o Židi čudaľinenas a phenenas: “Khatar džanel le Devleskero Lav, te na sikľiľa?”
16O Ježiš lenge odphenďa: “Miro sikaviben nane mandar, ale Olestar, ko man bičhaďa.
17Te vareko kamel te kerel le Devleskeri voľa, džanela, či hin oda sikaviben le Devlestar, abo či me korkoro mandar vakerav.
18Oda, ko vakerel korkoro pestar, rodel peskeri slava. Ale oda, ko rodel e slava oleske, savo les bičhaďa, vakerel o čačipen a nane andre leste klamišagos.
19Či na diňa tumenge o Mojžiš o Zakonos? A ňiko tumendar na doľikerel o Zakonos. Soske man kamen te murdarel?”
20O nipi odphende: “Demonos andre tu hin. Ko tut kamel te murdarel?”
21O Ježiš odphenďa: “Jekh zazrakos kerďom a savore tumen oleske čudaľinen.
22O Mojžiš tumen diňa o občhinďipen (e obriezka), vašoda tumen občhinen le manušes pro Šabbat (sombatone) – choc o občhinďipen nane lestar, ale le dadendar.
23Te o murš prilel o občhinďipen pro Šabbat, hoj pes te doľikerel le Mojžišoskero Zakonos, akor soske pre mande chan choľi, hoj sasťarďom pro Šabbat cale manušes?
24Ma sudzinen pal oda, sar pes dičhol avral, ale sudzinen o čačipnaskero sudos.”
25Akor phende varesave Jeruzalemčana: “Či oda nane ov, saves kamen te murdarel?
26A dikh, bi e dar vakerel a ňič leske na phenen. So, čačes prindžarde o anglune murša, hoj ov hin o Kristus?
27Se pal kada džanas khatar hino, ale sar avela o Kristus, pal leste na džanela ňiko, khatar hino.”
28Akor sikavelas o Ježiš andro chramos a zvičinďa: “Tumen man prindžaren a džanen the khatar som. No me na avľom korkoro mandar, ale oda, ko man bičhaďa, hino čačo, ale oles tumen na prindžaren.
29Me les prindžarav, bo som lestar a ov man bičhaďa.”
30Akor les kamenas te zachudel, ale ňiko pre leste na thoďa o vasta, bo mek na avľa leskeri ora.
31But džene ole nipendar andre leste pačanďile a phende: “Te avela o Kristus, či kerela buter zazraki, sar ov kerďa?”
32Ale sar šunde o Farizeja le nipen, hoj peske pal leste vakeren kajse veci, bičhade on the o nekbareder rašaja le sluhen, hoj les te zalen.
33Akor lenge o Ježiš phenďa: “Imar nabut časos som tumenca a paľis džava ke oda, ko man bičhaďa.
34Rodena man, ale na arakhena, a ode, kaj me som, tumen našťi aven.”
35Akor peske o Židi phende: “Kaj džala, hoj les amen na arakhaha? Či so, džala andre le Grekengere fori, kaj bešen amare manuša, hoj te sikavel le Greken?
36So hin oda, so phenďa: ‘Rodena man a na arakhena a ode, kaj me som, tumen našťi aven?’ ”
37Pre posledno baro džives andro inepos ačhelas o Ježiš a zvičinďa: “Te hin vareko smedno, mi avel ke mande a mi pijel!
38Andral oda manuš, ko pačal andre ma, avena avri o prudi le džide paňeha, avke sar phenel le Devleskero Lav!”
39Ale ada phenďa pal o Sentno Duchos, saves chudena ola, save andre leste pačana. Na sas mek dino o Sentno Duchos, bo mek o Ježiš na sas ilo upre andre slava.
40Varesave džene ole nipendar, save šunde oda lav, phenenas: “Ov hino čačes oda Prorokos.”

Read JAN 7JAN 7
Compare JAN 7:7-40JAN 7:7-40