Jan 7:1-14

¹Apwé sa, Jézi té ka alé toupatou an Galili, mé i pa té vlé alé an Joudiya, paski sé chèf Jwif-la té ka chaché mannyè pou té tjwéʼy.

²Sé pa té djè lontan Fèt Ti Kay-la.

³Sé fwè Jézi-a di Jézi, “Ki sa ou ka fè isi-a? Alé Joudiya pou sé moun-an ki ka swiv ou-a wè sé miwak-la ou ka fè-a.

⁴Pyèsonn pa ka séwé sa i ka fè si i vlé moun konnèt li. Ou ka fè sé bagay sala, kon sa fè yo pou tout moun wè èk pou yo konnèt ou!”

⁵(Pa menm sé fwèʼy-la ki té kwè an li.)

⁶Jézi di yo, “Tan mwen pʼòkò wivé. Népòt lè bon pou zòt.

⁷Sé jan latè-a pa hayi zòt, mé yo hayi mwen, paski mwen ka di yo sé bagay-la yo ka fè-a sé movèzté.

⁸Zòt sa alé an fèt-la. Mwen menm pa ka alé an fèt sala, paski lè mwen pʼòkò wivé.”

⁹I di yo sa, èk i wèsté Galili.

¹⁰Apwé sé fwèʼy-la vin alé an fèt-la, Jézi vin alé tou, mé i pa té kité pyèsonn konnèt li, i alé an sigwé.

¹¹Sé chèf Jwif-la té ka gadé pou li an fèt-la. Yo di, “Koté nonm sala?”

¹²Tout moun té ka palé an zòwèy konsèné Jézi. Adan moun di, “I sé an bon nonm.” Lézòt di, “An, an!” An lòt konpanni di, “Kwennen i ka kwennen sé moun-an.”

¹³Mé pyèsonn pa té ka palé pou moun tann, paski yo té pè sé chèf Jwif-la.

¹⁴Lè i té wèsté bò kat jou pou fèt-la fini, Jézi antwé an Kay Bondyé-a èk i koumansé enstwi.