JAN 6:25-44

²⁵A sar les arakhle pre aver sera le moroske, phende leske: “Rabbi, kana ade avľal?”

²⁶O Ježiš lenge odphenďa: “Čačes, čačes phenav tumenge: Tumen man na roden vaš oda, hoj dikhľan o zazraki, ale hoj chaľan ole marendar a čaľiľan.

²⁷Ma keren buči vaš o chaben, so našľola, ale vaš o chaben, so ačhela andro večno dživipen a so tumen o Čhavo le Manušeskero dela, bo pre leste thoďa o Del o Dad peskeri pečať.”

²⁸Akor leske phende: “So kampel te kerel, hoj te keras o skutki le Devleskere?”

²⁹O Ježiš lenge odphenďa: “O Del kamel oda skutkos: hoj te pačan andre Oda, kas ov bičhaďa.”

³⁰Akor leske phende: “Savo znameňje kereha, hoj te dikhas a te pačas tuke? So kereha?

³¹Amare dada chanas e manna pre pušťa, avke sar hin pisimen: ‘Diňa len te chal o maro andral o ňebos.’ ”

³²Pre ada lenge o Ježiš phenďa: “Čačes, čačes phenav tumenge, hoj na o Mojžiš tumen diňa o maro andral o ňebos, ale miro Dad tumen del o čačo maro andral o ňebos.

³³Bo le Devleskero maro hin oda, ko avel tele andral o ňebos a del le svetos dživipen.”

³⁴Akor leske phende: “Rajeja, de amen furt oda maro.”

³⁵O Ježiš odphenďa: “Me som oda maro, so del o dživipen, ko avela ke mande, na ela šoha (ňikda) bokhalo, a ko andre mande pačal, šoha na ela smedno.

³⁶Ale phenďom tumenge, choc man imar dikhľan, the avke na pačan.

³⁷Savore, saven mange del o Dad, avena ke ma a oles, ko avela ke ma, šoha na odtradava.

³⁸Bo na avľom tele andral o ňebos, hoj te kerav miri voľa, ale a voľa oleskeri, ko man bičhaďa.

³⁹Oda, ko man bičhaďa, kamel, hoj te na našavav ňikas olendar, so man diňa. Ale kamel, hoj len savoren te uštavav andral o meriben andro posledno džives.

⁴⁰E voľa mire Dadeskeri hiňi, hoj sako, ko dikhel le Čhas a pačal andre leste, te chudel o večno dživipen. A me les uštavava andro posledno džives.”

⁴¹O Židi pre leste reptinenas, bo phenďa: “Me som oda maro, so avľa tele andral o ňebos.”

⁴²A phenenas: “Či nane kada o Ježiš, o čhavo le Jozefoskero? Či na prindžaras leskere dades the da? Sar šaj phenel: ‘Avľom tele andral o ňebos?’ ”

⁴³Akor lenge o Ježiš odphenďa: “Ma dudrinen maškar tumende!

⁴⁴Ňiko našťi avel ke mande, te les na pricirdňahas o Dad, savo man bičhaďa. A me les uštavava andro posledno džives.