Text copied!
CopyCompare
Le Devleskero Lav Andre Romaňi Čhib 2019 - JAN - JAN 5

JAN 5:5-47

Help us?
Click on verse(s) to share them!
5A sas ode varesavo manuš, savo sas tranda the ochto (38) berš nasvalo.
6Sar les dikhľa o Ježiš te pašľol a prindžarďa, hoj imar hino but nasvalo, phenďa leske: “Kames te sasťol avri?”
7O nasvalo manuš leske odphenďa: “Rajeja, nane ajso manuš, savo man ľigenďahas andro paňi akor, sar pes čhalavel. A medik me dodžav, imar aver džal anglal ma.”
8Akor leske o Ježiš phenďa: “Ušťi, le tiro haďos a dža!”
9Oda manuš takoj sasťiľa avri, iľa peskero haďos a phirelas. Oda pes ačhiľa pro Šabbat (sombatone).
10Vašoda o Židi phende oleske, savo sas sasťardo: “O Šabbat hin, našťi ľidžas o haďos!”
11Ov lenge odphenďa: “Oda, ko man sasťarďa, phenďa mange: ‘Le tiro haďos a dža!’ ”
12Avke lestar phučle: “Ko hin oda manuš, so tuke phenďa: ‘Le tiro haďos a dža?’ ”
13Ale oda manuš, savo sasťiľa avri, na džanelas ko oda hin, bo o Ježiš odgeľa dureder pašal ola nipi, save pes ode zgele.
14Paľis les arakhľa o Ježiš andro chramos a phenďa leske: “Dikh, sasťiľal avri, imar buter ma ker o bini, hoj pes tuke te na ačhel vareso goreder!”
15Oda manuš geľa het a phenďa le Židenge: “O Ježiš man sasťarďa.”
16Vašoda džanas o Židi pro Ježiš, bo kerďa oda pro Šabbat.
17O Ježiš lenge odphenďa: “Miro Dad furt kerel, vašoda the me kerav.”
18Vaš oda lav les o Židi mek buter kamenas te murdarel, na ča hoj o Šabbat na doľikerel, ale mek the le Devles vičinel Dado a kerel pestar jekh le Dadeha.
19Avke lenge o Ježiš odphenďa: “Čačes, čačes tumenge phenav, o Čhavo našťi kerel ňič korkoro pestar, ča oda, so dikhel te kerel peskere Dades. Avke sar kerel o Dad, kerel the o Čhavo.
20Bo o Dad rado dikhel le Čhas a sikavel leske savoro, so ov kerel. A sikavela leske mek bareder veci sar kala, hoj pes tumen te čudaľinen.
21Bo sar o Dad uštavel le mulen a obdžiďarel len, avke the o Čhavo, kas kamel, obdžiďarel.
22Bo o Dad na sudzinel ňikas, ale savoro sudos diňa le Čhaske,
23hoj savore te den pačiv le Čhas, avke sar den pačiv le Dades. Ko na del pačiv le Čhas, na del pačiv le Dades, savo les bičhaďa.
24Čačes, čačes phenav tumenge, hoj hin večno dživipen oles, ko šunel miro lav a pačal oleske, ko man bičhaďa. Na džala pro sudos, ale pregeľa andral o meriben andro dživipen.
25Čačes, čačes phenav tumenge, hoj avela e ora a imar hiňi ade, sar o mule šunena o hangos le Devleskere Čhaskero a ola, save les šunena, dživena.
26Bo sar hin le Dades o dživipen andre peste, avke diňa the le Čhaske, hoj les te el o dživipen andre peste.
27Diňa les pravos te sudzinel, bo hino o Čhavo le Manušeskero.
28Ma čudaľinen pes oleske, bo avel e ora sar savore, save hine andro hrobi, šunena leskero hangos
29a ola, save mištes kerenas, ušťena andral o meriben a dživena, ale ola, save namištes kerenas, ušťena a avena odsudzimen.
30Me našťi kerav ňič korkoro mandar. Sudzinav avke, sar šunav le Dadestar a miro sudos hino čačipnaskero, bo na rodav miri voľa, ale e voľa Oleskeri, savo man bičhaďa.”
31“Te me vakerav korkoro pal mande, miro sveďectvo nane čačipnaskero.
32Aver svedčinel pal ma a džanav, hoj oda, so vakerel hin čačipen.
33Tumen bičhaďan manušen ko Jan a ov diňa čačipnaskero sveďectvo.
34No me na prilav o sveďectvo le manušestar, ale kada phenav vašoda, hoj te aven spasimen.
35Ov sas e momeľi, so labolas the švicinelas, a tumen kamľan sikra te radisaľol andre leskero svetlos.
36No man hin bareder sveďectvo sar le Jan. Bo o skutki, save mange diňa te kerel o Dad, me kerav. Ola skutki svedčinen, hoj man o Dad bičhaďa.
37The o Dad, savo man bičhaďa, korkoro diňa pal ma sveďectvo. Tumen šoha na šunďan leskero hangos aňi na dikhľan leskero muj.
38A leskero lav na ačhel andre tumende, bo na pačan oleske, kas ov bičhaďa.
39Roden andro Pisišagi, bo gondoľinen tumenge, hoj andre tumen hin o večno dživipen a ipen oda svedčinel pal mande.
40Ale na kamen te avel paš ma, hoj tumen te el o večno dživipen.
41O ašariben le nipendar na prilav,
42ale prindžarav tumen, hoj andre tumare jile le Devles na kamen.
43Me avľom andro nav mire Dadeskero a na prilen man, ale te avľahas vareko aver andre peskero nav, oles priiľanas.
44Sar šaj tumen pačan, te jekh avrestar rado prilen o ašariben, ale o ašariben le jekhore Devlestar na roden?
45Ma gondoľinen tumenge, hoj me pre tumende vakerava le Dadeske. O Mojžiš, pre savo pes tumen zmuken, ov pre tumende vakerela avri.
46Bo te pačanďiľanas le Mojžišoske, pačanďiľanas the mange, bo ov pisinelas pal mande.
47Ale te na pačan oleske, so ov pisinďa, sar pačana oleske, so me vakerav?”

Read JAN 5JAN 5
Compare JAN 5:5-47JAN 5:5-47