Iwata Ari 28:24-30

²⁴Edo embo nenei ge ro Paul mi tesiri ingido do wareregedo Yesu gebé esitera. Ata embo nenei gebé ae esitera.

²⁵Ainda amboda, awamanemi akuta ge baieite dodo aimain etero gido Paul mi ge dá engo awamaneda yai sisina, “Asisi Kotopu kaenato ewowo gawowoda yai gebé ge sisina. Ami peroveta Isaiah da yai ge eiwa tesiri gagurisina. Edo ge ro ami sisina awa imomane embo daedo:

²⁶‘Aundo embomai eiwamanede teyo gore, “Nato ge awa ingawa, ata mana gawo arapa aina. Edo nato buro awa gawa, ata ainda atopatari gain darawa.

²⁷Aindabé embomai einda do awa okain esitera, awamane gari tao ae. Awamaneda dengoro awa dunjitera, edo awamaneda jisi akeimbesitera. Awarata, edo awamanemi nato ge kera ain jipapa ara gido, awamaneda do pirigedo nato burobé awa jisimi gido, edo nato ge awa dengoromi ingaro arapa aina. Ango edo, awamaneda jimbo bebegae dodo wareregaro nane awamane gao ano kavieyegara.” ’

²⁸“Imomane dá ango God da ge awa ingain jipapa ae. Awatedo, imomane gawate tena awa, God mi ainda tonembari bino awa Judah embomai aeda yai piesiri maunsisina. Edo awamanemi ainda ge awa ingara!”

²⁹Edo iji ainde Paul mi ge eiwa tesiri, Judah embomai idegedo awamane akuta ge jiwae baieite maunsitera.

³⁰Edo Paul duberi tote (2) bé awa ainda oro ganumi orieite yai ainda isima edo esisina. Edo embomai berari embo awa etega ain gumboro ategabutega edo dave budo awamanede ge jirido esisina.