Iwata Ari 26:7-24

⁷Edo kaenato ewowo 12 ami tarigari eiwa bé ari bain tumonda eite ijide muyaende God tumondebain edo era. Daotari Agrippa, aindabé nato tumonda ari awa dá tarigarida einda piedo ena, awatedo, Judah embomaimi na bekumba edo era.

⁸Imomane nenei gebé edo ewa, God mi embomai betarida jiari erari tao amo, ro awa embo God mi embo betarida jiri erorisina awa gebé ae evi?

⁹“Edo nane akuta gisi kotembedo esitena, na Yesu Nasaret Embo da dao usibesi ana. Awatedo, na ainda embomainda yai memesi neindekainde pipisitena.

¹⁰Awatedo, wasiri ango awa daedo Jerusalem nasida esitena. Pirisi babain awamanemi namonde awara tari pietero embo kokotopu jiwae bundari oroda pipisitena. Edo iji ainde awamane doreiworo betedo esitera, nane awamaneda betari awara esitena.

¹¹Edo iji jiwae, na maundo Judah embomainda benunu oro da da, ainda torido idegedo eite, awamane vededo Yesu da yai ge bebegae ainde torote edo esitena. Edo na awamanede sinigambari bajinabé tega itae eite nasi babain aikamanabé ainda maundo memesi neindekainde awamaneda yai pisido esitena.

¹²Edo deguta da (1)de pirisi babain mi awara tari namonde pietero na Damasikas nasi bajina ainda pepeta esitena, gebé ari embomai ipami jido bunain.

¹³Edo nato daotari, ango edo begatada pepeta eno iji toropu eiri, parara utuda edo gumbiri gositena. Parara awa ijida parara daginegari ami nato yai datembesisina, edo embobo namonde pepeta esiterada yai daedo.

¹⁴Edo nakare berari butuda duduritera. Edo ainda amboda ge yavi Hiburu gemi nato yaida tesiri ingitena, ‘Saul, Saul! Ro awa embo memesi neindekainde namonde pisido esi? Ito mina mina nato yai ami ito yaida akuta memesi pisido eta, giyo!’

¹⁵“Ango edo nane tedogositena, ‘Imo averi, Badari?’ “‘Na awa Yesu, ande inemi memesi neindekainde pisido eta,’ ami mina sisina.

¹⁶‘Ata erido peteyo. Ro awa embo na ito yai idegeteni awa eire. Aindabé, nato buro embo atate awa imo avigetena. Edo inemi embomainde ro jisimi geta edo daedo amboda arapa ano gido awa karigato gara.

¹⁷Edo nanemi imo awa Judah embomai ae yai nenei embomai demi kundo usibesi eorekae, toregana. Imo awa nane awamaneda yai pieteno maunteta.

¹⁸Awamane kondade edo atopatato jisi pirigari muyaenda awa dodo egenembedo pararada gundo, Satan da gisijiarida awa dodo egenembedo God da gisijiarida itorote. Aindabé awa, awamaneda gebé ari awa nato yaida piaro, God mi awamaneda jimbo bebegae kotembedo dowari itae aina, edo daedo awamaneda yaibé ainda embo kokotopu doda awa piari bara.’

¹⁹“Awatedo, Daotari Agrippa, na garago girago God mi namonde utuda edo piesiri gositena awa ge jindae.

²⁰Ata na ge tuturo edo Judah embomainde Damasikas nasida, edo Jerusalem da edo yai Judea berari ainda karigedo esitena. Edo daedo yai nenei embomainde ge karigedo esitena. Edo ge awa nanemi karigedo esitena awa awamane God da yai wareregedo awamaneda wasiri bebegae dodo buro davegave aro awamaneda wareregari God da yai awa arapa arate.

²¹Aindabé na buro engo edo esitena, Judah embomaimi na oro kotopu bajina ainda doda tanjido dain esitera.

²²Ata iji ainde God na kondade esisina. Edo imo na kondade edo gundo deguta boroko einde matawa edo eira. Awatedo, na petedo embo saka de bajina de na ro gositena awa awamanede tedo ena. Edo peroveta mane ae Moses demi ro idegaina tedo esitera, awa dodo na ge eve tae.

²³Edo awamanemi tedo esitera, Keriso memesi budo betaina, edo embo awa gisibé bebetegarida edo eraina. Edo daedo tedo esitera awa, embo ami ainda ge parara ango Judah embomai ae yai nenei embomai de awa karigedo aina.”

²⁴Ango edo Paul imo akuta bere jiari ge site isiri Festus aoro ikanade gatedo sisina, “Ito kotembari idegesira giyo! Imo jirogari bajinabé buriteta ami eiri jiro beyae eira!”