Israel Hanigo Namba 24:5-22

⁵Eno te Israel dabego ugwa be sualio, tama te wiegi yai mu dao.

⁶Te ugwa be dabe bugagia dolo wasilama, te ni det bobobage nani dabe tiwai dao. Me, te genuai wę sesegede elalubo gi tiwai dao. Me, te Genuai Bidigo bulai wiegi yai ni alo tiwai dao, me te ni bǫ te wę sesegede elalubo tiwai dao.

⁷Te tulubage hauwa te Israel buluba tulaibao. Tama te Israel dabe augwa nai dabe te wiegi yai tǫde bulaibao. Te Israel dabego tuni bidigo bomo me genuai nogigo te Agak tuni bidigo nogi aiyaba elaluaibao. Tama Israel dabego tuni bidigo we bidi hani hauwa mu tonaluaibao.

⁸Godigo augwali Isip buludu oda selama, augwali eba odasa asai dao. Godigo te bulu uni kau kibu omai tiwai bomonama elama, tama Israel dabego boi bidi dabe aiyaba elalubo dao. Tama tialima, te Israel dabego te boi bidi dabego ene dolama, augwaligo dili mia sąwaibao.

⁹Israel dabe te boma pai laion tiwai dao. Te aga pilamubadi da, te bidi me deligo aga hodolobo usu egobeo. Ma, te bidi mego Godigo te Israel dabe dali wiegi yai sę yao po wali da, teda eno homugo Godigo te bidi dali wiegi yai sę yaibao. Ma, te bidi me deligo Godigo te Israel dabe dolomainao po wali da, teda eno homugo Godigo te bidi dolaibao,” Balamgo te po wai.

¹⁰Balakgo te po odama, aga sębę mu elama, aga nogo si elali. Tama agai Balambolo te po walali, “Eno nage i olama asali da, nago eno boi bidi dabe dolao po omainogo i wai dao. Tiali goli, nago sela sogo augwali bugagia bidaibao po walio.

¹¹Teda tagalao, ena hagela ebo. Nage naga buluba megi ma pao. Hasia eno mone dabe hauwa nagebolo mawaibao po wai dao. Tiali goli, Genuai Bidigo nago sunumi palialigo da, nago sogobeo,” wali.

¹²Tama Balamgo te po wei ponoyu, te po wali, “Odao. Eno nago ena oda sagasomainu taga palali bidi dabebolo eno polo wai dao,

¹³te nago te gol me silva dabe te tuni bidigo bede selama, ena mobaso me tagalao. Eno ena homugo sę me egobeo. Tiyu, eno Genuai Bidigo po sela sąidalio. Eno te Genuai Bidigo enabolo pusao wali po naga pusaibao,” Balamgo te po wai.

¹⁴Tama Balamgo Balak dali po genina ma weyu, te po wali, “Megi ena ena we bidiba ma paibao. Tiali goli, eno nagebolo te Israel dabego nago we bidi dali nosali yabo sę po nagebolo pusaibao.”

¹⁵Tama agai te profet po pusali, “Beorgo ogwa Balam, eno te po odao. Eno gedu wiegi yai mu elama, tama eno bugagia tonono bilibo dao.

¹⁶Tama eno Godigo pusubo po eno odobo dao. Tama eno God Dagalude Bidibo Bidigo mabo kolesaga sabo dao. God Tigidali Bomo Elalubo Bidigo enabolo te nade ebo sę tiwai enabolo haninani, tama eno te nai hania mu suali.

¹⁷Eno te nosali yabo sę dabe naga suali, te sę megi pedalugobeo. Tama eno te Israel dabe bidibo suali. Te bidi me deli te bomo dali genuai nogi yai bidi te Israel hani dabego tuni bidi pedalaibao. Tama agai te Moap tobolu bidi dabe dali bomona mu hwįaibao, tama augwaligo tobolu dili aluaibao, tama agai te Setgo hani wąį dabego tobolu dili dolama tagalaibao.

¹⁸Agai te aga boi bidi dabe te Idom bulude dolama, tama augwaligo tǫ saibao. Tama te Israel dabego bomonama, aga Seir boi bidi dabe augwali aiyaba elaluyu yaibao.

¹⁹Tama te Israel dabego te boi bidi dabe agalama, tama augwali mu dolaibao, tama augwali deli me bidigobeo,” wali.

²⁰Tama te Balamgo te nade suali nai dabe po, te Amalek dabe suali po te profet po augwalide pusali. Agai te po wali, “Te Amalek dabe te bomai bidi hani me deli bidai dao. Tiali goli, augwali nosali mu dolaibao.”

²¹Tama te nade suali te profet po te Kin hani bidi dabe po augwalide pusali. Agai te po wali, “Dagego te bidibo pesage te wiegi yai bomai pesage me deli dao. Dage te ba kemodagego be te bulu du te masigi yai bulude elalubo be tiwai dao.

²²Tiali goli, nosali te Asiria dabego dage dali hwįagaselama, dage dolama, tama dage Kin hani dabe kalabus elama, odasa paibao.”