Israel Hanigo Namba 23:12-23

¹²Tama Balamgo po wei ponoyu, te po wali, “Hobede mu dao. Tiali goli, eno te Genuai Bidigo enabolo mani te po naga nagebolo pusa mawaibao. Eno gasa po me pusugobeo,” te po wai.

¹³Tama nosali Balakgo Balambolo te po wali, “Ena dali asao, da si gasa buluba me pinao. Tama nago te Israel dabe pąde mu me bidibo suagameo. Nago tigidali mu sugobeo. Tama nage tede dolaluyu, augwali dolabo po wagameo.” Balakgo te po wai.

¹⁴Tama agai Balam te bulu Pisga te bulu duba dolo pali, te augwaligo te bulu aiyaba tonabo usu yai madi. Tama agai 7 alta nigilama, tama kau kibu omai 7; sipsip kibu 7 tama, te deli deli altade ofa yali.

¹⁵Tama Balamgo Balakbolo te po wali, “Nage e isigo ula silibo ofa pagede dolaluao, tama ena God uba sugi paibao,” wali.

¹⁶Tama Balam aga pelama, Genuai Bidigo aga sulama, tama agai wabo po pusa mani. Genuai Bidigo Balambolo te po wali, “Nage pelama, Balakbolo te po agabolo pusigi pao.”

¹⁷Tialima, aga ma pelama, te Balak te Moap tuni bidi dabe dali te isigo sese dela silibo te ofa pagede dolalubo suali. Tama Balakgo Balambolo hanaluyu, te po wali, “Genuai Bidigo nagebolo mena po maniwe?”

¹⁸Tama Balamgo te pusabo po pusali, “Balak, hodaluao, odao. Siporgo ogwa, eno megi e pusainogo ebo po odao.

¹⁹God da, aga te tǫde bidi mu menio. Godigo da bidigo yali gilama ili po me wabo menio. Agai homu da bidigo yali gilama me hasegelebo menio. Mu menio. Te agai magi sę me yainogo eyu, po dąų wali da, teda agai tama ebo dao. Agai te po wabogo naga te sę tama pedalobo dao.

²⁰Godigo enabolo te po pusumainao po wali, ‘Te Israel dabe bugagia bidaibao.’ God aga digi augwali bugagia bidimainu ilibo dao, tama eno hasegelebo usu egobeo. Mu menio.

²¹Te Israel dabeba pedelainu ebo sę eno suali, te augwali dali dwai sę elama, dolabo sę menio. Te mu menio. God augwa Genuai Bidi augwali dali bidibao, tama augwaligo te po wali, aga te augwaligo tuni bidi dao po walio.

²²Godigo augwali Isip bulude oda selama, asali dao. Tama augwaligo bomo te bomo yai bulu uni kau kibugo bomo tiwai dao.

²³Ma, te boi bidi dabego pobi weyu, me kebele aulama augwali elali da, tego augwali me dologobeo. Tama tialima, megi te gasa we bidigo te Jekopgo hani dabede te po waibao, ‘Te Godigo Israel bage augwali tau sainogo genuai sę dabe mu yali suao.’