Israel Hanigo Namba 22:11-33

¹¹te we bidi hani me deli Isip bulu tagalama, tama Moap bulu tigidali usu nani wabo po pusainu asai dao. Tama agai homugo eno te god dabebolo olama, te god dabego augwali dolama, tama agai te bage dali bomo elama hwįnama, augwali sela sąwaio wali,” Balamgo te po wai.

¹²Tiali goli, Godigo Balambolo te po wali, “Nage te bidi dabe dali me pelamu dao, tama nago te Israel dabe dolao po me wagi pelamu dao. Magi baso meni, ena augwali dali bidama, augwali eno bugagia tonaluai dao,” wali.

¹³Tialima, kigamu te Balam te Balakgo tuni bidi dabe pageba pelama, te po wali, “Dage naga duga buluba ma piąo. Ena me pogobeo. Genuai Bidigo ena dage dali pigio homu yalio.”

¹⁴Tialima, te bidi dabe augwali Balak pageba pelama, te po wagi pali, “Balam da dali asobo hagela yalio,” te po wai.

¹⁵Tialima, nosali Balakgo te tobolu bidi dabe te hasia pali bidi dabe tobolu bidi nogi edelai bidi dabe hauwa mu i olama asali.

¹⁶Tama agai augwalibolo agai po Balambolo pusigi pomainu yali. Balakgo po e dao, “Balam, nage ena pageba tama asao. Eno homugo nage magi nai mego nage dąų omainu igio homu ebao.

¹⁷Nage aselama, tama nage eno nai dabe hauwa mu menama, tama nago homugo enabolo ya wabo nai dabe sese tama eno yaibao. Tama tiali, eno homugo nage aselama, tama te we bidi dolabo bomai po nago wagasao,” Balakgo te po ola tolali.

¹⁸Tama augwali pelama, sabolama, te po Balamba pusali. Tiali goli, Balamgo te Balakgo sę bidi dabebolo te po wali, “Te Balakgo ena agai be te silva de gol sigo pągąnama, tigidali mobadi me tagalao. Eno Godigo po me sela sągobeo. Te eno Genuai Bidigo magi nai me dabede me sela sągobeo.

¹⁹Tiali goli, dage eno bede hulide piao, te hasia asali bidi dabego yali gilama, tama eno suaibao, Genuai Bidigo enabolo po meba me magowe nama suaibao, ma meni yaliwe suaibao,” te po wai.

²⁰Tialima, te sogo hulide God Balam pageba aselama, te po agabolo wagasali, “Te bidi dabe aselama, nage augwali dali pinao olama, hanalu wagasali dao. Tiali megi da, nage augwali dali pagameo. Tiali goli, nago tigidali sę eno nagebolo wabo te sę naga yagameo. Nago gasa sę dabe me naga homugo me elamuo,” wali.

²¹Tama tiali, kigamu Balam aga kibu donkide dualama, te Moap tuni bidi dabe dali pali.

²²Balam aga hogodasa pabode, Godigo aga dali sębę yali. Balam aga donkide dualama peyu, tama aga sę ebo bidi si aga dali peyu yali. Tama Genuai Bidigo ensel sunumide dolaluyu, sunumi palialuali.

²³Te enselgo bainat hwą tolaluyu, sunumide dolalubo suali, tama tibaso donkigo sunumi tagalama, bogo badu pali. Tama tibaso, Balamgo aga donki elama, sunumiba ma tagala palali.

²⁴Tama nosali te ensel ma pelama, te wain gi si elalubo sunumi tomoba doligi pali. Tama te pesagede da, te sunumi pena sai madi, te masigigo te obo yai madi te sunumi sesege si tama badu.

²⁵Donkigo ensel dolalubo suali, tama tibaso donki te oboba mu dagana sali madi te Balamgo sągą pena sali. Tama tibaso, Balamgo donki ma elali.

²⁶Tialima, te ensel polasa ma pelama, te sunumi dwasianu mu yai digi doligi pali.

²⁷Tama te donkigo te ensel subaso, agai koneani, agai te ensel edelegobe homu koneama, tama aga te sunumide pigiluali. Tama tibaso, Balam aga sębę elama, te donki kibu wabi dage selama elali.

²⁸Tama Genuai Bidigo donki kibu po omainu ilali, tama donkigo Balambolo te po wali, “Eno nage dali magi sę ebaso, nago ena sela sogo elaliwe?”

²⁹Tama Balamgo donkibolo te po wali, “Nago ena te polai bidi tiwai gagalalio. Tama tibaso, eno nage sela sogo elalio. Ma, eno bainat hwą tolalugi sogo da, eno nage ela mugi dao.”

³⁰Tama donkigo te po wali, “Ena naga donki mu dao, tama nage enade nage gesi bidide gagalama dualasa bilibadi, megiba tama te usu nagasobao. Eno te tobage sę nage dali hasia me yai dawe? Ma meniwe?” Tama Balamgo menio wali.

³¹Tama Genuai Bidigo Balamgo te ensel bainat tolaluyu sunumide dolalubo sumainogo ilali. Tama polo tama Balam gesabidi aiyaba elama, tǫba degasa dulali.

³²Tama enselgo agabolo te po walali, “Magi baso nago naga donki sela sogo tama elaliwe? Odao. Eno nago sunumi paliainu asai dao. Magi baso meni, nage pabo eno wiegi yai homu ebeo.

³³Tiali goli, nago donkigo ena sulama, sela sogo te gasa badu pai dao. Ma, te donkigo tama tigi meni sogo da, eno nage ela munama, donki naga tagaligi dao,” te po wai.