Israel Hanigo Namba 20:3-14

³Tama augwaligo Moses dali wado po hauwa weyu, e tama po wali, “Te usu igi dao, da te Genuai Bidigo ugwa be mesalode dena abagi dali isigi sogo da, usu igi dao.

⁴Magi baso nago da e wa pai buluba odasa asaliwe? Nago homugo da me dago hasa dabe e bulude isimainogo yaliwe?

⁵Tama me nago magi baso da Isip bulude odasa e dwai buluba odasa asaliwe? Dago te nai bulubo usu isąma yabo digi? Te bulude te wiegi yai wit me te wiegi yai ni du dabe me menio. Me te ni wain me menio, me te tuabo ąį me menio,” te po wali.

⁶Moses de Aron sigo te po odama, tama te we bidi taga pelama, tama augwali si te Godigo ugwa be sunumiba doligi pali. Tama augwali si gesabidi aiyaba elama, degasa dulali. Augwali sigo te tama tibo si, Genuai Bidigo ula augwali siba pedelali.

⁷Tama Genuai Bidigo Mosesbolo te po wali,

⁸“Te Dąų Wali Bomai Po Munolubo Halobage pąde munalubo te dono selama, tama nage dali Aron dage sigo te we bidi sisinama, tama augwali gedude nago te u genuai masigi dali po walama, tama wę tedu asaibao. Nago te tama tibo kolesagago te wę te masigidu asobadi, te we bidigo, me kau kibu, me sipsip, augwaligo te wę tumainao,” wali.

⁹Tama Mosesgo Genuai Bidigo po wali pelama, tama te dono sigi pali.

¹⁰Tama Moses de Aron sigo te we bidi te moni genuai masigi pageba sisinigi pali, tama Mosesgo augwalibolo te tama po walali, “Odao, dage te po sela sąbo we bidi dao. Te dago dagego wę te masigide saibawe?”

¹¹Tama te Mosesgo te masigi dali po wabe. Menio. Agai te dono selama, si sogo te masigi elali. Tama moni ąį te masigide pedalali, tama te we bidi, me augwa kau me sipsip dabego te wę tuali.

¹²Tiali goli, Genuai Bidigo Moses de Aron sibolo e tama po wali, “Megi da e sogo dage sigo eno po sela sąnama, tama dage sigo enaba homu dąų wabeo. Tama dage sigo eno bomo te Israel we bidibolo ola mabeo. Tialima, duga si digi te Israel we bidi eno augwali te mawainogo po dąų wali te buluba odasa pogobeo,” te po wai.

¹³Te sę te bulu Meribade pedelai dao, te da te Mosesgo te wę pedalumainogo yali te bulu dao. Te Meribade te Israel we bidigo Genuai Bidi dali te po hauwa mu wali, tama Genuai Bidigo te Israel dabebolo aga te holi, tedali gasagi yai, te magi meni yai mu dao olama te ola mayu, tama agai te po sela sąbo kolesaga hagela ebo dao olama ola mani.

¹⁴Te Israel dabe te Kadesde bidibadi, Mosesgo Idom tuni bidiba po sela pabo bidi meba taga palali. Augwaligo agabolo e tama po wagi pali, “Dago naga deli hanigo po sesebao. Te augwali te Israel dabe dao. Augwaligo nagebolo e tama tiwai po walali, ‘Nago koneani, dade te haniani sę pedalali nago koneani.