Israel Hanigo Namba 16:36-42

³⁶Nosali Genuai Bidigo Mosesbolo e tama po wali,

³⁷“Te pris bidi Arongo ogwa Eleasarbolo te isigo dali te bidi dabego bras plet sao, tama nage pageba sesao, te po agabolo wao. Tama nosali nago selama, digibulu gana ma pelama, tama te pletide elalubo isi dabe buluba sąsąyao. Magi baso meni, te plet dabe te eno nai dabe mu dao, tama habu selai nai mu dao.

³⁸Te plet dabe te bidi dabe te Genuai Bidi eno altaba pali sogo habu selai nai pedelai dao. Tama augwaligo te wiegi yai denami hano holobo ofa yai dao. Tama tialima, te dwai sęgę selama, isai bidi dabego plet seselama, tama elama, tama olo kapa dage tiwai pedalumainao. Tama te bras kapago te alta mesegelao. Te Israel dabego te brasgo te alta halualubaso, augwaligo koneaibao. Tama augwaligo te bidi dabego yali kolesaga tiwai egobeo,” te po wai.

³⁹Tama Mosesgo te pris Eleasarbolo te po wabo si, te Eleasargo te plet dabe sali. Tama bidi mebago te plet halubo si, te plet te bras kapa sawali dage tiwai pedelali, te alta haluabo kapa tiwai pedelali.

⁴⁰Te halubo nai te Israel dabego homu dąų walabo dao. Tama augwaligo koneaibao, te Arongo hanigo naga te altaba pelama, te wiegi yai denami hano holobo pauda te Genuai Bidigo gedude uluyu yaibao. Ma, te gasa olo bidi dabego te tobage ofa ebaso da, Genuai Bidigo aga te Kora aga hani dali dolali tiwai aga hani dali dolaibao. Tama Eleasargo te Genuai Bidigo Mosesgo penanedu wali po wali pelama, te sę dabe dolo tama yali.

⁴¹Te sogo bidama me sogo bubugade, tigidali we bidigo Moses de Aron si dali wado po wali. Augwaligo e tama po wali, “Dage sigo Genuai Bidigo we bidi meba elalio.”

⁴²Augwali sese polo sisinani, te Moses de Aron si dali wado po wainogo. Tama augwali begelama, Godigo ugwa beba tonani, tama augwaligo suali, pǫgo te ugwa be mesega sai suali. Tama Genuai Bidigo ula haninama mu ebo suali.