Israel Hanigo Namba 16:12-34

¹²Tama Mosesgo te Datan de Abiram si asao wabo po ola tolali. Tiali goli, augwali sigo po wei ponoyu, e tama po wali, “Da si asogobeo,” po wali.

¹³“Nago da wiegi yai bulu Isipdu odasa e nai meni yai buluba odasa aselama, da ela isilainu asai dao. Tama nago homugo te da, te olo sę dawe? Tama megi me nago da tonaluainuwe?

¹⁴Nago da te wiegi yai buluba me odasa pai menio, te dago nai gi dabe elaluyu, me wain gi dabe elalu emainu odasa pai menio. Nago homugo da te kolesaga meni yai, tama nago da ili po ola mawaibawe? Nago usu egobe, tama tibaso da si me asogobeo,” te bidi sigo te po ola tolali.

¹⁵Mosesgo te po odama, aga sębę elama, tama Genuai Bidibolo e tama po walali, “Nago te bidi hani dabego sesali ofa nago selamu dao. Augwaligo te po wali, eno augwali subigila tolalubo po wali. Tiali goli, eno augwaligo kibu donki deli me wi siyu, me augwali dali dwai kolesaga me eyu me ebeo. Mu menio,” wali.

¹⁶Tama Mosesgo Korabolo e tama po walali, “Do nage me te nage wali pabo 250 bidi, dage te Godigo name ugwa beba asiąo. Tama Aron me tama asaibao.

¹⁷Tama dage deli deligo isi dabo nogobo plet te wiegi yai denami ilibo pauda tede munama, tama Genuai Bidibolo agai altaba aselama, ofa yagasao.” Te po wai.

¹⁸Tama te sogo kigamu te bidi dabe augwa te wiegi yai denami ilibo te pauda ulubo te plet sesali. Tama augwaligo te plet dabede te isi dage munama, tama te wiegi yai denami ebo te pauda te isi daide muani. Tama augwali te Moses de Aron si dali te Godigo ugwa be sunumiba doligi pali.

¹⁹Nosali Korago te we bidi sese sisinama, tama augwali te Moses de Aron si bidiboba hobolu gelama, augwali si tonaluali. Augwali si me te ugwa be sunumide dolaluali. Augwali polo sina silibo si, Genuai Bidigo agai ula te Israel dabe tigidaligo sumainogo haninama pebili dilide mu yali, tama tigidali Israel dabego suali.

²⁰Tama Genuai Bidigo Moses de Aron sibolo e tama po wali,

²¹“Dage si gedao. Te we bidi taga pao. Megi tama eno te we bidi ela silaibao,” wali.

²²Tiali goli, Moses de Aron si gesabidi tǫba elama, degasa duliyu, augwali sigo Genuai Bidibolo e tama po wali, “God, nago deli naga te tigidali tǫde bidibo we bidi nigilama, augwali te bidibao. Te bidi deligo dwai sęgę sai madi, tama nago tigidali Israel we bidi ela silaibawe?”

²³Tama Genuai Bidigo Mosesbolo e tama po wali,

²⁴“Te we bidibolo te Kora, me Datan, me Abiram, augwaligo ugwa be tagalama, digibulu obanu gana pao po wao.”

²⁵Tama Moses de Israel dabe tuni bidi dabe augwali te Datan de Abiram si sugi pali.

²⁶Tama Mosesgo tigidali we bidibolo e tama po walali, “Dage tigidali ugwanu kila sesa piąo, te dwai bidi dabego ugwa be pąde, tama augwaligo nai dabeba me dagana selama me elamuo. Tiyu, dage augwa pąde bidiyu da, augwaligo sęgę dage me isabuo.”

²⁷Tama te we bidi augwaligo odama, augwali ugwaba kila selama, Kora, me Datan, me Abiramgo ugwa be dabe taga pali. Tiali goli, te Datan de Abiram si augwa ugwa be buluba aselama, augwa be sunumiba dolaluagasali. Tama augwa we wai dabe me augwali dali dolaluali.

²⁸Tama Mosesgo te we bidibolo e tama po wali, “Te megi magi nai me pedalainu ebo dagego megi sueibao, tama dagego koneaibao, Genuai Bidigo digi ena taga palama, dage tonalumainu yai dao. Eno ena homu kolesagago me ebeo. Mu menio.

²⁹Megi da, te bidi dabe isaibao. Ma, Godigo augwali elisąma ebaso da, tama augwali olo dwai isibaso da, teda dagego koneagameo, te Genuai Bidigo agai sę emainogo ena tagala palobe, te homu yaibao.

³⁰Tiali goli, Genuai Bidigo gasa sunumi medu te bidi dabe isilibaso da, te e tiwai elama, te tǫ tomode mu peda pelama, tama te bidi dabe augwa doado bage dali te tǫ dedageba gealubaso da, tama augwali bidibadi te isai bidigo buluba pobaso da, teda dagego koneaibao, te bidi dabe augwaligo te Genuai Bidi tudi ola menama, agai po sela sąwali dao,” te po wali.

³¹Mosesgo po ola silibo si, polo tama te Datan de Abiram si dolaluali te tǫ tomode peda pelama, genuai tǫ dedage mu yali.

³²Tama te Datan, me Abiram, me Kora, me aga dali bidali bidi dabe, augwa we wai puluba, me augwa doado bage sese tama, te tǫ dedageba tula pelama, tama te tǫ ma madua sali, tama te bage mesega sali.

³³Tialima, augwali isisąbadi augwali augwa we wai, me augwa doado bage dali te isai bidigo buluba pali, tama te tǫ ma madua selama, augwali mesega sali, tama te we bidi dabego augwali munu me ma subeo.

³⁴Te augwali te dedageba tulaluali sogo, augwali hǫą dwai mu wali, tama te Israel we bidi te pąde bidali we bidi augwaligo te po wali, “Da wi polo pinao, tiyu da te tǫ peda peyu, da me te tǫ dedageba tola pelama, da me hagayabuo.” Tama tibaso, augwali wi polo pali.