Israel Hanigo Namba 15:8-22

⁸Ma, te bidi me deligo te omai bulmakau sesiyu, te isigo sese ula silibo ofa uluyu, ma te dąų wali po usu nubo ofa uluyu me, ma homu deliba dąų wabo te ofa ulainogo da,

⁹teda agai te kilogram sela yai plaua te lita si yai oliv wel dali selama, taluao.

¹⁰Me agai te wain wę lita si yai siyu, tama elama seselama, tama te nai dabe te kau kibu omai dali ofa yao. Ena Genuai Bidi, eno te tobage wiegi yai denami ebo ofa eno godolo ebo dao,” tama wali.

¹¹“Dagego te tobage plaua, me oliv wel, me wain tama enabolo ofa iyąo, te tigidali deli deli kau kibu omai dali me, sipsip kibu omai dali me, sipsip kibu gǫų, dagego enabolo ofa ebo dabe tama tiao.

¹²Ma, dagego kau kibu si ma sela ofa eyu da, te dagego te deli kau kibu usu nama plaua, me wel, me wain, te deli deli hasa usu nama, ofa yao.

¹³Tama te tigidali sogo dage Israel dabego Genuai Bidi eno godolo ebo denami ebo ofa dagego me yainogo da, teda dagego te plaua, me wel, me wain, te ofa dali tama eyu yao.

¹⁴Ma, te gasa bulu bidi aga dage dali pęwadage sogo, ma dagego bulude mu bidainu bidibo bidigo Genuai Bidi eno godolo ebo ofa yainogo ebaso da, teda agai emainao. Te bomai po tigidali sogo elalua pidu piduaibao, tama te wąį nosali asobo te wąį dabeba mu tama usu nigi paibao. Tiali goli, agai te ofa ebo bomai po wali pomainao, te dage Israel dabego ebo kolesaga ebo tiwai yao.

¹⁵Te bomai po deli naga elalubao, te Israel dabe dage me te gasa bulu bidi dabe dagego wali pabo po elalubao. Te bomai po tigidali sogo elalua pidu piduaibao, tama te wąį nosali asobo te wąį dabeba mu tama usu nigi paibao. Magi baso meni, ena Genuai Bidi eno suali, dage Israel dabe me gasa hani bidi dabe deli mu tama yai yalio.

¹⁶Dage Israel dabe me gasa bulu bidi dabe me, dage deli kolesaga naga yao, te ofa ebo kolesaga.” Te po wai.

¹⁷Genuai Bidigo te po Mosesbolo

¹⁸te po Israel dabebolo magi pao po wali. Agai e tama po wali, “Megi da, eno dage mawaibao wali te tǫba te odasa pobao. Tama nosali dage tede bugagia dualaluaibao.

¹⁹Tama dagego nai gegelama, tama nai tau yai saibao, tama dagego tuainogo da, teda dagego te nai dabe meba selama, enabolo ofa tiwai maiąo.

²⁰Te hasia mu dagego te hasia plaua witgo bret nigiyu da, dagego bret meba selama, enabolo ofa tiwai maiąo. Te witgo nai mu sabo pesagede mu selama, enabolo geside mu ofa yao. Te dagego te nai mibo pesagede mu selama, mao.

²¹Dage me, duga wąį nosali pedalobo hani, dagego te hasia mu te ulubo te bret selama, tama enabolo te ofa tiwai maiąo,” wali.

²²“Dagego te bomai po Mosesgo nogode sali, tama nosali pedalobo hani dabego me saibao. Tiali goli, bidi mebago kuna konesąma, te bomai po meba bolaibao.