Isanquienare Joa 7:15-47

¹⁵Yoajeitanaque cavaco joriopee. Icanti: —¿Jaoca icantari iotantarori paitapeerica? Tecatsi oameterine.

¹⁶Yacanaqueri Jesoshi: —Te naro iotashitearone oca noametimpiri, irinti iotacaanaro yora tiancaquenari.

¹⁷Pincoasanoterica panteneri inintacaaquempiri, aitaque piotanaque. Piotanaque itiancaquenarica Tasorentsi. Piotanaque noneaveetashitarica.

¹⁸Yora neaveetashitachari icoi impincatsayeeyeteri iriori. Intimerica coatsiri impincatsayeeyeteri tiancaqueriri, icameetsati iriori; te irioteji iramatavitante.

¹⁹Tempa irootaque icantajeitimpiniri Moishishini peerani: “Jeroca pantayeteri”. Iro cantaincha tecatsi aca matasanojeiteroneri oca icantaquempiniri. ¿Paita pisareantanari poyena narori?

²⁰Yacajeitanaqueri apatojeitainchari: —Yoitsaviantaquempi camaari. ¿Janica sareimpiri iroyempi?

²¹Yacanaqueri: —Jero aparo notasoncantaque saavaroqui, meeca poajeitanaquena cavaco maaroni.

²²Icantimpiniri Moishishini: “Pintoyeantea”. Iro cantaincha caari ini Moishishini cantasanotatsine, irintiquea yora intasanotaroniri. Irootaque meeca pitoyeantantacari. Pitoyeantapinita aisati saavaroqui amaoreantari.

²³Tempa pitoyeantapinita saavaroqui, pimoncaratantarori isanquenatiniri. Irosati saavaroqui noavisacotantariri yora shirampari. Aiquero piquisanaitiana. ¿Paitaquea?

²⁴Ariorica pamenavoroteri pishaninca, eiro picantashitatsi: “Cameetsari ini. Yora pashini te incameetsateji”. Pijivateta piotasanoteri, impoijiquea piotanaque paitarica pinquenquetsatacoteriri. Aisati onquempetea, pinquenqueshiretasanotero nocantimpiri piotasanotantenari.

²⁵Irosati icantayetantanaca jerosaresati aparopee: —¿Caarimpa yoca icoyeetiri iroyeeteri?

²⁶Pameneri meeca, yoametantayeti, te irimaneroji. Tecatsi cantimenterine: “Pimajerete”. ¿Yaamaajeitarimpa avincatsarite iriosanotaque yoca Quirishito?

²⁷Iro cantaincha ayotacojeitaqueri arori jaoca iponeacari yoca. Impocasanotapaajerica Quirishito, tecatsi iotacoterine jaoca imponeempari iriori.

²⁸Yoametanti Jesoshi ivancoqui Tasorentsi, icanti: —¿Piojeitanampa? ¿Piotimpa jaoca noponeacari? Te nompocashiteaji, timatsi tiancaquenari: icameetsatasanotaque catsini. Te pioteriji avinti,

²⁹narori niotiri nainti. Iriotaque tiancaquenari, iriotaque noponeimotacari.

³⁰Irosati icoajeitantavetacari iraayerime. Iro cantaincha tecatsi ayerine. Tequeratsita omoncarateaji iraanteeteariri.

³¹Oshequi apatojeitainchari quemisantajeitaqueriri. Icantayeti: —¿Ariorica impocapaaque Quirishito, iranaacotapeerimpa Jesoshi intasoncantayetapee?

³²Yora variseopee iquemajeitavaqueri atiri iquenquetsatacojeitaqueri Jesoshi. Irosati itiancantacari variria iraayerime. Iriojeitaque tiancaqueriri jivatacaajeitiriri saserotepee, variseopee aisati.

³³Irosati icantantanacari Jesoshi atiri: —Capichanivaniji nontsipajeitanajempi. Irotanaintsi nompianaje tiancanariqui.

³⁴Pincoajeivetajenarica, iro cantaincha eiro pineajanatsi. Jaocarica nosavicapaaje eiro pimatirotsi pijataje avirori.

³⁵Icantanaque jorio: —¿Jaocampa irijateri yoca eiro aneantajaritsi? ¿Ariompa irijatashiteri ashaninca savicayetatsiri pashinipeequi nampitsi? Irioyeata oamejeitapeerine itsipapee atiri.

³⁶Jero icantaque: “Pincoajeivetajenarica eiro pineajanatsi. Jaocarica nosavicapaaje eiro pimatirotsi pijataje avirori”. ¿Paita icantantari?

³⁷Irootaque quitaiteri ivecaratantarori iquimoshirejeitanaque. Irosati icatiantanaca Jesoshi. Icajemanaque: —Maaroni miretatsiri impocashitenata irirapeeta,

³⁸ontimanteari ishirequi quemisantanari nija oaneantatsiri, oncontejatapaaqueri. Aitaque oquenquetsatacotiro Sanquenarentsi nija nocantaquempiri.

³⁹Iro ishiacantaqueri nijatatsiri Ishire Tasorentsi, quiso oajeiterine quemisantajeiterine corajicani. Iro cantaincha tequeratsita iroancajeaji Jesoshi jenoqui, irootaque caariquera opocashitantari quemisantajeitatsiri.

⁴⁰Apatojeitainchari ara iquemajeitavaqueri icantaqueriri Jesoshi, irosati icantayetantanaca aparopee: —Iriotasanotaque yoca camantantatsiri aamaajeitacari.

⁴¹Pashini cantayetatsi: —Iriotaque Quirishito. Pashini cantatsi: —¿Ariompa imponeempari Quirishito Carireaqui?

⁴²Tempa ocanti Sanquenarentsi: “Quirishito irio irishanincatajeari Iravirini. Imponeaquea Verequi, anta isavicaveitani Iravirini peerani”.

⁴³Impoiji icantavacaimentajeitacari Jesoshi.

⁴⁴Timatsi aparopee coayevetachari irayerime, iro cantaincha te irimateroji.

⁴⁵Ipiajeitanaja variria. Yareetapaajari jivatacaajeitiriri saserotepee, jeri variseopee. Icantajeitavajiri: —¿Paitasa caari pamantanari aca? Nocantavetimpi incaranqui: “Pamaquenari”.

⁴⁶Yacanaqueri: —Cameetsa ineanati yonta shiramparinta. Cameetsa yoametanti, tecatsi pashini quempetearine.

⁴⁷Icantavaqueri: —¿Yamatavitajimpimpa aisati avirori?