Isaias 1:8-30

⁸Ne wazè en nesamà gawas te Jerusalem. Neiring heini te helungà diyà te pemuleey te paras etawa lawig diyà te menge pemuleey te timun he iyan dà nekehitindeg. Ne iring daan heini te inged he edliǥuyan te menge kuntada.

⁹Emun wazà uuyag he midsamà kenitew te Nengazen he Mekeǥeǥehem, ne egkeiring kiw en te Sodom wey Gomora.

¹⁰Sikiyu is menge ebpemendumala wey menge etew ziyà te Jerusalem, he iring te menge tig-Sodom wey tig-Gomora, pemineǥa niw is lalag wey kesuǥuan te Nengazen he Megbevayè tew.

¹¹Ke sikandin te, “Wazà bali kayi te kediey te mahabet he menge pemuhat niw. Midsemu ad te menge pemuhat niw he edtutungen menge kerehidu wey menge tavà te menge uyaǥen he impelambù niw. Wazè ku ikelipey is lengesa te menge tudu he vaka, menge kerehidu, wey menge kambing.

¹²Hentei ves is midsuǥù keniyu he uwita niw heini is langun emun uvag ed-ezapen a keniyu? Hentei is midsuǥù keniyu te kedtekutak te valey ku?

¹³Engked kew en te ked-uwit te menge pemuhat he wazè dan pulus. Igkeremerik ku is beyewè niw. Kenè ku en egkaantus is menge kevurunan niw emun Pista te Kebpuun te Hayag wey emun Andew te Kedhimeley, su minsan edtiǥum kew ne mezaat is baal niw.

¹⁴Egkeepesan ku is menge Pista niw te Kebpuun te Hayag wey is duma he menge pista niw. Igkeveǥati ku heini; ne kenè ku egkaantus.

¹⁵“Emun ebpengemuyù kew ne kenè ku sikiyu ebpemineǥen. Kenà a ebpemineg minsan kepipira kew pa med-ampù, su mahabet en is mibpenhimetayan niw he menge etew.

¹⁶Mebpekelumpiyu kew! Engked kew en he ebaal te mezaat diyà te etuvangan ku.

¹⁷Penginenau kew te kebaal te meupiya, wey iyan niw ikula is hustu he kukuman. Dewaya niw is menge ebpemeǥespeǥes, wey levani niw is ketenged te menge ilu wey menge valu he vahi.”

¹⁸Migkaǥi pa is Nengazen te, “Hendini kew, su edhusayen tew heini. Minsan sengemenu keremerik is menge salè niw, edlumpiyuwan ku heeyan su wey kew mehimu he lumpiyu.

¹⁹Emun ebpezumazuma kew kedì, ne edtuvazan ku sikiyu.

²⁰Piru emun edsupak kew wey ebpekidsukulè kew, ne siguradu ebpemematey kew. Egkehitavù heini, su iyan a, is Nengazen, is migkaǥi kayi.”

²¹Ahàa niw man is inged he Jerusalem. Hein aney metinumanen is menge meǥinged kayi, piru ǥuntaan neiring en sikandan te vahi he ebelegyà te zengeg din. Hein aney metazeng he menge etew is ebpemen-ubpà diyà te Jerusalem, piru ǥuntaan menge teremunù.

²²He Jerusalem, hein aney mevali ka iring te pelata, piru ǥuntaan wazè nu en pulus. Hein aney iring ka te vinu he wazè din sahug piru ǥuntaan nesehuǥan te wahig.

²³Is menge pengulu nu ne mibpekidsukulà wey miduma te menge tekawen. Egkesuat dan he layun edsipsip, wey ebuyù sikandan te menge gasa. Wazè dan levani is ketenged dutun te menge ilu wey wazè dan pemineǥa is riklamu te valu he menge vahi.

²⁴Umbe, migkaǥi is Nengazen, he Mekeǥeǥehem he Megbevayà te Israel te, “Ebelesan ku sikiyu is menge tig-Jerusalem he menge kuntada ku, su wey kenà ad mesekiti tenged te menge vaal niw.

²⁵Edsilutan ku sikiyu su wey kew melumpiyuwi iring te pelata he edlunsayen pinaaǥi te hapuy.

²⁶Ed-umanan ku sikiyu ebeǥayi te menge pengulu wey menge sumesambag iring duen te nehuna. Ne ziyà te huziyan he timpu egkengezanan is inged niw te inged te menge metazeng wey menge metinumanen he menge etew.”

²⁷Pinaaǥi te metazeng he kukuman te Megbevayà, edlibriyen din is Jerusalem wey is menge meǥinged kayi he ed-iniyug te mezaat.

²⁸Piru edezeetan din mulà is menge mesinupaken wey menge mekesesalà, he edselikwey te Nengazen.

²⁹Egkepeel-elezan kew is menge tig-Jerusalem tenged te ked-azap niw ziyà te menge kayu he ulayan wey ziyà te pinilì niw he menge pemuleey.

³⁰Egkeiring kew te kayu he ulayan he neǥangu, wey te pemuleey he wazà mevinyaǥi.