Isaias 10:6-18

⁶Edsuǥuen ku is menge tig-Asiria te kedsurung te egkeepesan ku he nasyun. Heini is nasyun, kenà sikandan edsunud kedì te Megbevayè dan. Heini sikandan, edezeetan ku iring te vasak diyà te kersada he edtekutakan, wey mepenguwa te menge tig-Asiria is langun he menge azen dan.”

⁷Piru kenà egketuenan te hadì te Asiria he egemiten dà sikandin te Nengazen. Kunaan din ke ebpendezeetan din dà is mezakel he menge nasyun.

⁸Ebpahambug sikandin he egkaǥi te, “Is menge peremandar te menge sundaru ku ne henduen be te menge hadì.

⁹Wazà mibizahayan te Carkemish te Calno, wey Arpad te Hamat, wey is Damascus te Samaria? Neked-iiring dà heini he menge inged su pudu ku naaǥew.

¹⁰Kayi en te palad ku heini is menge ginhedian he ed-azap te menge ed-ezapen he lavew pa te menge ed-ezapan diyà te Jerusalem wey Samaria.

¹¹Midezeetan ku en is Samaria wey menge ed-ezapen kayi. Ne iyan gihapun heeyan ebeelan ku te Jerusalem wey te menge ed-ezapen kayi.”

¹²Piru iyan heini migkaǥi te Nengazen he egkehitavù emun egkepasad din en is ebeelan din he ebpekesuǥat te Buvungan he Zion wey ziyà te Jerusalem: “Edsilutan ku is hadì te Asiria tenged te kegkemepelevawen din wey kegkegelbuwen!

¹³Su migkaǥi is hadì te Asiria te, ‘Nehimu ku heini tenged te zesen ku wey ketau ku: Midpen-aǥew ku is mezakel he menge nasyun wey is menge ketiǥeyunan dan. Iring a te tudu he vaka; nezaag ku is menge hadì dan.

¹⁴Mibpenguwa ku is ketiǥeyunan te menge nasyun he iring dà te nenguwa a te impis diyà te mid-ewaan he selaǥà. Wazè en midrerekubkub etawa nemekak.’ ”

¹⁵Lavew ve is wasey etawa gavas te migamit duen? Iyan be egkevitbit te lagkut is migawed duen?

¹⁶Umbe, is Nengazen he Mekeǥeǥehem ebpeeǥiyan din te zaru is menge sundaru te hadì te Asiria, he menge meupiya is kedlelawa. Ebinsulan te Nengazen is ketiǥeyunan kayi te edriyubriyub he hapuy.

¹⁷Is Nengazen he iyan sulù te Israel wey waǥas he Megbevayè dan, egkeiring sikandin te edriyubriyub he hapuy. Ebinsulan din seled te meǥaan dà heini is duǥiyen he zezeisey he kayu he iyan is Asiria.

¹⁸Iring te edezeetan te zaru is lawa te etew, edezeetan daan te Nengazen is ketelunan wey is uuzaran he vevesukà te hadì te Asiria.