Isaiah 10:11-28

¹¹Se ani Samaria ko kuar dora ago lilim ilu abowa tugumem uwuta, Jerusalem ko kuar dora ago uwuta me bitirikko e?'”

¹²Bare tom Kari Biya ko tuetera dun, duruk Zion se Jerusalem ningi bitawoso mu bita saparuk mu, nu baluk, “Ani Assyria gomang motam nunguning te numi patawu se kuring kapa lagaram mu, koma memek tuekkowo,” maukko.

¹³“Mu awuk, nu kuring kapa se balukaso: “'Ani am sinar kari, se aga ikia sinar mu te, se aga sokel te, sor sor nunga morem parusuwurem; ale nunga ali giem, ale nunga mel ningo ningo mu nongote gi saperem; ale kari nuar kaya biya ko sanamerem ale nunga king bibiya, nunga daiga kuwim ago, nunga parusuwu warem.

¹⁴Kakirip inangnang singir, kuting ningi garuku kam, ani sor sor nunga mel ningo ningo ko agiting garukukasam; ale inangnang ko singir ningo ago waru sapara ale nagura se kakirip gi kam, ani sor sor nunga gi bolala la abowa ningi nunga awurem; bo ta inangnang iwita bingok nagurokko me terong, agi bo ta kuring paguk ale niaruk kikirukko me terong tala.'”

¹⁵Awuk? Burir mu yam giris palaguk ale noko sokel mu, kari sapawoso mu ko sokel kiaram iwita ma baluk i? Agi mel tam isiso umu numi patawu se kari sapawoso mu mel yam ko am bitiruk i? Mena. Uwutatala kager ko tam mu, kager ko kari nu iluwoso umu me guruguso patawuso, agi kager ko tam umu kager kari umu kualala patawurukko me terong tala!

¹⁶Bore te se, Kari Biya, Yawe Sokel Garagar mu, kuera ikes memek te Assyria ko kager kari alo, welang minan bibiya, mu nunga maguwurok se merang kituwura amonko. Ale ko mel ningo ningo, te numi patawuwoso, mu tama kuamili biya ningi menawurokko.

¹⁷Nu kota mu Israel ko Nikim, se nu tama iwita bagarukko; nu kota nunga Kakirip Laili, se nu tama kuamili iwita kani se, day tom suanta wore ningi la, Assyria tam se mayang singir kore ago mu iwita kai maliluwurokko.

¹⁸Kariimet bo kuera ikes ago maga kuena namoso iwita, ko giarum yawara yawara, se ko ali welang welang, mu ko ali lilim la ago maguwu saparukko.

¹⁹Ale ko giarum tama kani maliluwuram mu ningi, tam gotek awilaya sanamiwasan mu suen mena se, kuriang gotek bo yam kau tutia saparukko terong.

²⁰Tom umu te mu, Israel kariimet motam gotek, se Jacob ko gue te me maga namaman bagasan mu, awiriya nunga bita maguwu lagaman mu nongote me loaga se lagamonko, bare nongomang motam lilim la, Yawe, Israel ko Kakirip Laili, mu te la ira sanami se lagamonko.

²¹Kariimet motam gotek bo pelemonko, nuna Jacob ko gue te ko kariimet motam gotek mu, Kaem Sokel Garagar mu kote pelemon taimonko.

²²O Israel, nunguningta, nika kariimet mu langi saun iwita, kaura koma mena, bare ninga pelera taira mu, kariimet motam gotek awilaya pelemon taimonko. Noko tuetera ningo diram ko munan te nika magara kuenera mu maingkala balu beteram, se lom iwita tairuk ka tagirokko.

²³Nunguningta, aninga Kari Biya, Yawe Sokel Garagar, mu magara kuenera maingkala balu beteram se aniso mu, nika sor ali lilim awote bitiruk se kaparukkowo.

²⁴Bore te se, aninga Kari Biya, Yawe Sokel Garagar, iwita balso: “O aninga kariimet Zion bagasan mu, nina Assyria alo nunga me nguangaralko; nuna Egypt alo kiwem memek bitakasan iwita, bu ningarmon agi manga tam ningarmon, mu ko me nguangaralko.

²⁵Mu awuk, kam me maiyuk se aninga angamang magara nenenga ko mu menaruk, ale geraguk nuna nunga maguwurok silatarukkowo.”

²⁶Yawe Sokel Garagar, sor manga Oreb te masan mu te Midian arika nunga maguwuram iwita, wip te nunga batutumurokko; ale gagi gomang te sikir patawuram se ikup munan Egypt nungumik te aratam mu iwita, Assyria ikup memek tuokko.

²⁷Tom umu kaparuk se ikup nina nibiwinang te mu kututuwu waruk, ale ngasaru nedegetak te mu wirok kaparukkowo, mu awuk, nina noko ningo nuam ningi welang minan gemaral ale gopa palagalko.

²⁸Assyria kager giram Aiath iluwam; asele Migron wonong tuagu ningi aratam; kapa Mikmas wonong te ko melmasak awuram.