ISAIA 1:8-30

⁸Siona natuna hahinena na e nohomu, kalaga vine imeana lalonai na heto, rumaruma kiukamba umana ai na heto, e koua heḡeḡe hanuana na heto.

⁹Iehova Saboata ese kwabukwabuda basinema hamaurida, ita na Sodoma heḡereḡerena ai baitama noho, bona Gomora heḡereḡerena ai baitama hahelao.

¹⁰Sodoma lohiamui e, Iehova ena hereva a kamonai! Gomora taumui e, eda Dirava ena hahediba herevadia a hakala heni!

¹¹Iehova na e tomu: Emui boubou ḡaudia momo egu ai be dahaka? Mamoe mamaruanedia e haḡoledia oho ḡaudia, bona ubu-ubu ḡaudia digaradia, vada na abi davana. Boromakau mamaruanedia eiava mamoe natudia eiava nani mamaru-anedia raradia asina moalelaimu.

¹²Vairagu ai o hedinaraimu negadia ai, daika ese e hamaoromui egu ikou tanodia ba moimoilai?

¹³Herahia ḡaudia asi anidia haida ma basio mailaidia; muramura mai bonana na ḡau dika-rohorohona egu ai. Hua matamatadia bona dina helaḡadia bona hebou boiboidia, kara havara bona hebou helaḡadia, na egu ai seme heḡereḡere.

¹⁴Emui hua matamatadia bona emui aria negadia na lau laumagu ese e inai henidiamu; idia na maduna metauna egu ai, ihuadia ai na hesikumu.

¹⁵Imamui ba toi roro negana ai, lau vairagu baina hunia emui ai; ena e ḡuriḡuri momo ba gwaurai, to lau basina kamonai; imamui na rara ai e honumu.

¹⁶Sibomui ba hehuri; sibomui ba haheḡoeva; emui kerere na vairagu amo bavabi oho. Kara dika ba hadoko,

¹⁷kara namo ikarana dalana ba tahua; hahemaoro ḡoevaḡoeva ba tahua; hahehisi karadia ba lao ahu; ihareha ba gimaia, vabu dainai ba hereva.

¹⁸Iehova na e tomu: Aoma, aita hereva hebou. Ena be emui dika na paira na heto, to bae huroka-kuroka snow heḡereḡerena; ena be idia na kakakaka herea, to mamoe huina heḡerḡerena ai baela.

¹⁹Lalomui bema manada bona boma kamonai, umui ese tano anina namona boma ania;

²⁰a boma gwau edeede bona boma daḡedaḡe, dare ese bema alamui mamase; badina be Iehova uduna vada e hereva.

²¹Kara momokani hanuana, hahemaoro ḡoevaḡoeva ai e honuva hanuana, na ariara hahinena heḡereḡerena ai vada ela. Kara maoromaoro na ia lalonai e nohova, a harihari roroma taudia ese e noholaiamu.

²²Emu silver na ḡau mirona ai vada ela, emui vine ranuna na ranu ida vada e hebulo.

²³Emui lohia na daḡedaḡe taudia, bona henao taudia ibamodia; iboudiai na koikoi henitaona e ura heniamu, bona herahia ḡaudia e ḡavadiamu. Idia ese ihareha se gimaiamu, bona vabu ena heatu-kau dalana se haeroamu.

²⁴Taunabunai Ḡaubada, Iehova Sabaota, Israel ena Goada Diravana, eto: A! Egu badu na inaigu latadiai baina seia kau, bona e inai henigumu taudia baina hadava henidia.

²⁵Imagu na baina toi roro henimui, emui miro na muramura amo baina havevea oho, e bulolaimui ḡauna dikana idoinai baina abia oho.

²⁶Emui hahemaoro taudia baina haginidia lou, gunaguna heḡereḡerena, bona emui haealo taudia danu, nega gunadia ai na heheto. Gaeamo bae gwauraimui kara maoromaoro hanuana, bona kara momokani hanuana.

²⁷Siona na hahemaoro ḡoevaḡoeva ese baine hamauria, bona ia lalonai vada e helalo kerehai taudia na kara maoromaoro ese baine hamauridia.

²⁸A daḡedaḡe taudia bona kara dika taudia na bae habuadia tari hebou, bona Iehova e rakataniamu taudia na bae aradia ore.

²⁹Badina be oak audia, o moalelaiva ḡaudia, daidiai ba hemarai, bona uma-uma, vada o abi hidi ḡaudia, daidiai vairamui bae kakakaka.

³⁰Badina be umui na oak auna, rauna e maraimu ḡauna, bona uma-uma asi pariparina, heḡereḡeredia ai ba hahelao.