ISAIA 11:5-13

⁵Iena Basileia taudia be do ia gunalaia, mai maoromaoro bona momokani danu.

⁶Uda sisia bona mamoe, be do idia noho hebou mai maino danu, bona taiga be nanigosi danu do idia hekure hebou. Boromakau natuna bona laiona natuna be do idia aniani hebou. bona taunimanima ena natuna maragina ta ese do ia hakaudia.

⁷Boromakau hahine bona bea, be do idia aniani hebou. Edia natudia do idia hekure hebou mai maino danu. Laiona ese rei kakoro do ia ania, boromakau ese ia ania bamona.

⁸Rata ia inua merona, be gaigai ena guri latanai do ia gadara, bona mero ese gaigai koremana ena guri lalonai, iena imana do ia toia vareai.

⁹Siona, Dirava ena ororo helagana dekenai, dika ta, o hadikaia gauna ta do ia noho lasi. Badina be tanobada ibounai, be Lohiabada ena diba maoro dekena amo do ia honu momokani, davara be ranu dekenai ia honu bamona.

¹⁰Unai dina dekenai, Iese ena Ramuna, King matamatana unai, be bese ibounai taudia ese do idia tahua. Ia be do ia gini, bese ibounai edia pepe, bona bese idauidau taudia ese ia dekenai do idia haboua. Iena noho gabuna be do mai hairaina momokani.

¹¹Unai dina dekenai, Lohiabada ese nega iharuana dekenai, iena siahu dekena amo, iena bese taudia, do mauri noho taudia, do ia abidia mai lou, Asuria, Aigupito, Pataro, Etiopia, Elama, Babulonia, Hamata bona kone kahana gabudia dekena amo.

¹²Ia ese pepe ta do ia abia isi, bese idauidau taudia ese, iena kara do idia itaia totona. Bona ia ese Israela bona Iuda taudia, tano idauidau dekenai hesiai mai guia danu karaia taudia, do ia haboua lou. Unai neganai Lohiabada ese, unai Israela bona Iuda taudia do ia mailaia lou edia gabu dekenai.

¹³Bona unai neganai, Israela taudia ese Iuda taudia do idia mama henia lou lasi. Iuda taudia ese danu Israela do idia ura tuari henidia lou lasi.