ISAIA 10:3-24

³Dika davana iabina dinana ai dahaka ba karaia? Lai gubana dauha amo bainema negana ai dahaka ba karaia? Daika ba heau henia baine kahamu totona? Emu taḡa be edeseni ai ba rakatania?

⁴Dala ta lasi, to e abidia mauri taudia bogaragidiai ba raki, eiava e aladia mase taudia bogaragidiai ba moru. Ina idoinai vada e vara, to ena badu do se keru, ia imana na doini e hetoi roromu.

⁵A! Asuria na egu badu auna, egu badu-ḡaraḡara gahina.

⁶Dirava se matauraiamu besena ihadikana totona na siaia laomu; na haganiamu, na badu henidiamu taudia na baine hadikadia. Baine dadidadi, kohu momo baine dadi; baine moimoilaidia, ariara kopukopuna na heto.

⁷A unu se laloa tomamu, ena lalo-hadai na dia unuheto; a ena ura be hahebua-tari, bese diaḡau baine butudia tao.

⁸Badina be ia na e tomu: Egu tuari lohiadia iboudiai na dia papavapava a?

⁹Kalano na Karakemisi ida vada e heḡereḡere, bona Hamat na Arapada ida vada e heḡereḡere, bona Samaria na Damasko ida vada e heḡereḡere, ani?

¹⁰Imagu ese kaivakuku ibadinadia basileiadia vada e toi roro henidia, edia dirava laulaudia, e koro ḡaudia, na Ierusalem bona Samaria edia e hereadiava gabudia;

¹¹matona, Samaria bona ena dirava laulaudia vada na kara henidia heḡereḡerena ai, Ierusalem mai ena kaivakuku ida basina kara henidia a?

¹²Ḡaubada ese ena ḡaukara idoinai Siona Ororona bona Ierusalem latadiai baine ha-orea murinai, ia ese Asuria pavapavana ena hekokoroku herevadiabona ena heaḡi bada-herea daidiai baine hadikaia.

¹³Badina be una taue tomamu: Lau imagu goadana amo vada na karaia, bona egu aonega amo danu; badina be lau na lalo-parara taugu. Bese idau-idau edia tano hetoadia vada na abidia oho, bona edia kohu namodia vada na dadi; bona terono ai e helaiva taudia vada na doridia dobi, boromakau maruanena ese bema doadia dobi heḡereḡerena.

¹⁴Imagu ese bese idau-idau edia taḡa vada e davaridia, tau ta ese manu rumana bema davaria na heto; bona manu hahinena ese vada e rakatanidia gatoidia na taunimanima ese e haboudiamu heḡereḡerena ai, lau ese tanobada idoinai tagadia vada na haboudia; ta ese hanina se hamarereamu, eiava uduna se haḡaiamu, eiava se taimu.

¹⁵Ira na sibona baine heaḡi, e utu-utulaiamu tauna baine dadaraia a? Eiava iri na sibona baine heimodai, e iri-irilaiamu tauna baine dadaraia a? Una na au ese e abia isimu tauna bema kwadi-kwadilaia, eiava gahi, au ḡauna, ese tau, dia au ḡauna, bema abia isi na heto.

¹⁶Taunabunai Ḡaubada, Iehova Sabaota, ese taudia ihavaroda-varodadia gorerena na ena tuari taudia goada-hereadia bogaragidiai baine siaia; ia hairaina henunai hururu ta baine vara, lahi hururuna na heto.

¹⁷Israel Diarina na lahi ai bainela; ena Helaḡa Diravana na lahi hururu-hururuna ai bainela; ena au ḡiniḡini bona ena ava ḡiniḡini baine aradia, dina tamona ai baine aradia ore.

¹⁸Ena uda bona ena tano namona hairaidia na Iehova ese baine habuadia tari, lauma ai bona tau-anina ai; gorere tauna e varoda-varodamu heḡereḡerena ai bainela.

¹⁹Ena uda audia oredia bae gadoi vaitani dainai, mero maraḡina ta ese baine hagaudia diba.

²⁰Una dina ai Israel kwabukwabudia bona Iakob iduhuna ena roho-mauri taudia ese idia e rahudia mase tauna enai basie tao lou, a Iehova, Israel ena Helaḡa Diravana, enai bae tao mai momokanidia ida.

²¹A kwabukwabudia na bae lou mai, Iakob iduhuna kwabukwabudia, Siahu Diravana bae lou henia.

²²Badina, ena be emu bese Israel na kone mirina na heto, to kwabukwabudia mo bae lou mai. Kara maoromaoro na e hepurai dobimu, una dainai hahebua-tari na vada e hahedualaia.

²³Badina be Ḡaubada, Iehova Sabaota, ese baine haḡuḡurua vaitani, hahedua heḡereḡerena, tanobada idoinai bogaraginai.

²⁴Taunabunai Ḡaubada, Iehova Sabaota, na ini e gwau tomamu: Egu bese taumui e, Siona ai o nohomu taumui e, Asuria taudia ese au amo bae rahumui mase bona edia gahi na ihadikamui totona bae abidia isi, Aigupto taudia e karaia heḡereḡerena, negana ai idia garidia basio gari.