ISAIA 10:16-33

¹⁶Taunabunai Ḡaubada, Iehova Sabaota, ese taudia ihavaroda-varodadia gorerena na ena tuari taudia goada-hereadia bogaragidiai baine siaia; ia hairaina henunai hururu ta baine vara, lahi hururuna na heto.

¹⁷Israel Diarina na lahi ai bainela; ena Helaḡa Diravana na lahi hururu-hururuna ai bainela; ena au ḡiniḡini bona ena ava ḡiniḡini baine aradia, dina tamona ai baine aradia ore.

¹⁸Ena uda bona ena tano namona hairaidia na Iehova ese baine habuadia tari, lauma ai bona tau-anina ai; gorere tauna e varoda-varodamu heḡereḡerena ai bainela.

¹⁹Ena uda audia oredia bae gadoi vaitani dainai, mero maraḡina ta ese baine hagaudia diba.

²⁰Una dina ai Israel kwabukwabudia bona Iakob iduhuna ena roho-mauri taudia ese idia e rahudia mase tauna enai basie tao lou, a Iehova, Israel ena Helaḡa Diravana, enai bae tao mai momokanidia ida.

²¹A kwabukwabudia na bae lou mai, Iakob iduhuna kwabukwabudia, Siahu Diravana bae lou henia.

²²Badina, ena be emu bese Israel na kone mirina na heto, to kwabukwabudia mo bae lou mai. Kara maoromaoro na e hepurai dobimu, una dainai hahebua-tari na vada e hahedualaia.

²³Badina be Ḡaubada, Iehova Sabaota, ese baine haḡuḡurua vaitani, hahedua heḡereḡerena, tanobada idoinai bogaraginai.

²⁴Taunabunai Ḡaubada, Iehova Sabaota, na ini e gwau tomamu: Egu bese taumui e, Siona ai o nohomu taumui e, Asuria taudia ese au amo bae rahumui mase bona edia gahi na ihadikamui totona bae abidia isi, Aigupto taudia e karaia heḡereḡerena, negana ai idia garidia basio gari.

²⁵Badina be asi vanahana egu lalo-siahu baine ore, bona egu badu eseidia ihabua-taridia baine matamaia.

²⁶Bena Iehova Sabaota ese ikwadiva varona amo baine hadikadia, Midian na Oreb nadi-ginina badibadinai e rahua mase negana heḡereḡerena ai; bona ena itotohi na davara daenai baine he toi roro, bona baine abia isi, Aigupto ai e karaia heḡereḡerena.

²⁷Una dina ai ena maduna metauna na pagamui amo baine heabi oho, bona ena maduna auna na aiomui amo baine kwaidu oho. Ia na Rimon amo vada e dae lao,

²⁸Aiata ai vada e kau; Migron vada e rakaia hanai, Mikmasa ai ena kohu e habouamu;

²⁹Ororo makana amo vada e hanai, Geba ai e taruha rani; Rama na e heude-heudemu, Gibea, Saulo ena hanua, vada e heau.

³⁰Galimi hahinemu e, a tai badabada! Laisa e, a kamonai! Anatoto e, a haere henia!

³¹Madamena na e heaumu; Gebimi inoholaina taudia na e heau maurimu.

³²Hari ina dina ai, ia na Nob ai baine gini, imana baine kahua kuboro-kuboro, Siona kekenina ena ororo baine kahu kuboro henia, Ierusalem ororona bunai.

³³A itaia, Ḡaubada, Iehova Sabaota, ese au rigidia baine utu oho, mai siahu herea-daena ida; atai ḡaudia na baine utudia gari, atai-herea ḡaudia na henu ai bae heato diho.