Isaia 10:12-23

¹²Tó Dii a yãkɛa Yelusalɛũ Siↄna gbɛ musu lɛzɛ̀, a Asiliↄ kía swã́gagaɛ̀ wala pↄ́ a vĩ ń aà wɛkũaamao yã́i.

¹³Asa à mɛ̀: Má kɛ̀ ń mazĩa gbãaoɛ ń ma ↄ̃nↄo, asa ma wɛ́ zɛ̃aɛ. Ma bùsu zↄ̃lɛↄ dɛ̀, ma ń àizɛɛↄ nàaa, ↄ̃ ma ń gↄ̃sa kpalablenaↄ pã̀lɛ.

¹⁴Lá wì ↄgɛ̃ bã sakpɛu, màa ma buiↄ àizɛɛↄ nàaa. Lá wì gbe pↄ́ bã gòa sɛ́lɛ, màa ma ń bùsuↄ sì píi. An kee i kúu'oao, an kee i lɛwɛ̃aaao.

¹⁵Tó wa mↄo kũao, a zĩkɛe? Tó wi sii sɛo, a zĩkɛa? Lípana a liaa ń a kũnaoe? Go a fɛlɛ ń gbɛ̃́ pↄ́ lɛ́ pↄgbɛ̃òoe?

¹⁶A yã́i tò Dii Lua Zĩgↄ̃de a ibabagyã kpa Asili kíapi zĩgↄ̃ kãapiↄzi, i to tɛ́ aà gawi kↄ'ɛ.

¹⁷Isailiↄ Gupua a gↄ̃ tɛ́ ũ, an Lua Kuaadoade a gↄ̃ tɛ́vua ũ, i kũ Asili lɛaaↄ ń aà lɛsikaoↄwa gↄↄ do kóũ.

¹⁸A aà likpɛↄ ń aà swaluↄ gawi midɛ míↄ, aa láa lán gyãe ibabaawa.

¹⁹Lí pↄ́ a gↄ̃ aà likpɛu aↄ dasio, baa nɛ́fɛ̃nɛna a fↄ̃ a lɛ́ dↄ̃ɛ.

²⁰Zĩbeezĩ sa Isaili kↄ̃naↄ na gbɛ̃́ pↄ́ lɛ̀lɛmápiↄ kpɛ lↄo. Yakↄbu bui pↄ́ bↄ̀piↄ, Dii an Lua Kuaadoade ↄ̃ aa nai ń sĩanao sa.

²¹Yakↄbu bui kↄ̃naↄ ɛa su, gbɛ̃́ kↄ̃napiↄ ɛa zɛ ń Lua Gbãadeo.

²²Isailiↄ, baa tó á gbɛ̃́ↄ dasi lán ísialɛ ũfãawa, an kↄ̃naↄ mɛ́ aa ɛa su. Pisaboa looaála kɛ́ yã́zɛde e kɛ zài yã́i.

²³Asa Dii Lua Zĩgↄ̃de mɛ́ a mↄ́ ń kaalɛ pↄ́ a dìlɛo á bùsuu píi.