Isaías 1:8-19

⁸Sión-yala, uva-nainugi binsa dukued-neg olloo-siidaedyobi daklenaded. Melón-digar-naidgi, binsa neg-ollobi-siidyobi daklenaded, neggwebur, dule-isdarmaladse ebirilessiidyob gued.

⁹Ar Bab-Jehová-Bela-Gangued-Nikad anmar-gwenna-gwenna-odulossulina, Sodoma-dulemaryob anmar gumogoenad, Gomorra-dulemaryob anmar obelolemogoenad.

¹⁰Sodoma-e-dummagan, Bab-Jehová-ibmar-soged be itomar. Gomorra-neggwebur, anmar-Bab-Dummad-Igar-Maid be itomar.

¹¹Bab-Jehová soged: “Be-ibmar-ukleged-bukidaradi, ¿ibi-nuedga anga wis gue? Ar gwen an abemaisulid. Ar sibad-wawaad-machergan-ogumakar-anga-ukleged an budar dakgusad. Ar ibdurgan-wardummagan-e-gwallu-anga-ukleged an budar dakgusad. Moli-bebe-nikad-machergan-e-ablis an abesulid, sibad-wawaadmar-e-ablis an abesulid, sibad-machergan-e-ablis an abesulid, we-ibmarmar, gwen bai an daksulid.

¹²¿Ibiga be an-asabin danimala? ¿Doa bega ibdurgan-sedamaloye sogsa? Unnila anse-goled-neg-imba-oichogega be nonidamalad.

¹³Melle bar be anga ibmar-ukleged-gwen-igarga-gusulid sedamalo. Ar ina-wawadikid anga ibmar-isganaga gued. Nii-binidgi, iba-onoleged an budar dakgusad, obunnoged-ibagi, iba-onoleged an budar dakgusad, dulemar-bular-onmaknonidamalad an budar dakgusad, be-an-nug-odummomalad, aka bur an-ourwe damalad, bar an itobisulid.

¹⁴Bemar nii-binid-gwisguedgi iba-onogedi, an budar itogusad. Itoakwaa-iba-onolegedi, an budar itogusad. Ibmar-nuedga gwen anga gusulid, abali, an budar itogusad.

¹⁵Bemar anse-goledgi argan-onakwialile, an bemar-dakosulid, wagar-biir an bemar-idu imakoed. Ar gandikidgi bemar anse gornanaile, an bemar-itogosulid. Ar bemar dulemar-ibe ablis eosmalad.

¹⁶”¡Isguedgi be bangumar, swilidik be gumar! ¡An-asabin ibmar-isgana-imakedgi be bangumar! ¡Melle bar ibmar-isgana be imakmar!

¹⁷¡Igar-nuegan-imaked be durdakmar! ¡Igar-napiragwad be imakmar! ¡Dule-mesagwar-imaklediid be bendakmar! ¡Dule-sergan-satedga be igar nabomar! ¡Siamar-ei-sui-burgwismalad-ular, be gwisgumar!”

¹⁸Bab-Jehová soged: “Be dagmar, anmar igar nudakmargwelo. Bemar-isgued, ginnitibiyob-gue-inigwele, boo-sibudikidyob-dakle naoed. Bemar-isgued, mor-ginnidyob-gue-inigwele, sibad-wawaad-e-absar-dagudikid-daklegedyob naoed.

¹⁹Ar bemar an-sogedba nanamaloye sogele, be-yargi ibmar-nuegan-sanmakoedi be gunmaloed.