Isɑ̃ɑ̃ 20:6-21

⁶Kɛ̀ Simɔɔ Piɛrii tuɔkɛní kɛ́tɑ kɛ́yɑ̀ tiyɑ̀ɑ̀tì bɛ̀ pɔ̃ṹ ntì Yesu kɛ̀ tì duɔ́ kɛtenkɛ̀.

⁷Kɛ̀ kuyɑ̀ɑ̀kù kùù do fĩ ndiyuu kɛ̀ kù kpɛ́ú kɛ cɑ̃ɑ̃ nkɛ duɔ́.

⁸Kɛ̀ Yesu tɑncɔ́ùntì tɔù wèè do niitɛ́ kɛ́tuɔkɛ, kòò múnkɛɛ tɑ kɛ́yɑ̀ kɛ́ntɑ̃́.

⁹(Yesu tɑncɔ́ùmbɛ̀ mu ndo í bɑntɛ́ tìì wɑ̃̀ri kɛ tú: Yesu do nkɛ́yɑ̃́ntɛ́.)

¹⁰Dɛ kó difɔ̃nkúò kɛ̀ Yesu tɑncɔ́ùmbɛ̀ɛ kò.

¹¹Kɛ̀ Mɑɑri kpɑɑ́ kɛ́cómmú kufɔ̃ti bɛ̀nnì kɛ kuɔ̀, nkɛ sĩ́nnɛ́ kɛ́síékɛ́

¹²kɛ́yɑ̀ Kuyie ntɔ̃rɛ̀ yɛ̀dɛ́ɛ̀ kɛ̀ yɛ̀ dɑ̀ɑ́tí tiyɑɑ̀pɛ́ítì kɛ kɑri bɛ̀ do dɔú ndɛ̀ Yesu, dii nho yuu do duɔ́ dɛ̀, ditɛrì o nɑɑ̀cɛ̀i do borɛ̀.

¹³Kɛ̀ yɛ̀ɛ ò bekɛ kɛ dɔ̀: Onitipòkù ɑ kuɔ̀nnɛ̀ bɑ? Kòo yɛ̀ tɛ̃̀ńnɛ́ kɛ dɔ̀: Bɛ̀ tùótɛ́ n Yiɛ̀ nwe, m mɛ nyí yɛ̃́ bɛ̀ ò yĩ́mɛ̀.

¹⁴Ò bɛ́i mɛmmɛ kɛ́wɛ̃ɛ̃tɛ kɛ́yɑ̀ Yesu kòò còḿmú, ò mɛ nyí nhò bɑntɛ́.

¹⁵Kɛ Yesu ò bekɛ kɛ dɔ̀: Onitipòkù dɛ̀ dòmmɛ kɑ̀ɑ kuɔ̀? A wɑɑ̀ nwe? Kòo yɛ̀mmɛ̀ ńdo okũnyɔ́ɔ̀rìwè nwe, kɛ dɔ̀: Kɛ̀ fɔ̃́ɔ̃̀ ò tùótɛ́, m bɛnkɛ ɑ ò dɔú ndɛ̀ kɛ̀ n kɔtɛ kóò tùótɛ́.

¹⁶Kɛ̀ Yesu ò yu kɛ dɔ̀: Mɑɑri! Kòo bunnɔ́ɔ kɛ dɔ̀: Okótì! Nɛ̀ bɛ kó tinɑ́ɑǹtì miɛkɛ dɑbunnii!

¹⁷Kɛ̀ Yesu ò nɑ̀kɛ́ kɛ dɔ̀: Bɑ́ n kɑ́ɑ́kɛ́, m mu nyí dèkɛ n cicɛ borɛ̀. Kɔtɛ kɛ́nɑ́kɛ́ n kɔbɛ kɛ dɔ̀: N deètì n cicɛ borɛ̀ ndɛ, wèè tu di kóo cicɛ, Kuyie nkùù di te.

¹⁸Kɛ̀ Mɑɑri Mɑkitɑdɑɑ ɛì kouu kɔtɛ Yesu tɑncɔ́ùmbɛ̀ borɛ̀ kɛ dɔ̀: N yɑ̀mu ti Yiɛ̀. Kòo bɛ̀ nɑ̀kɛ́ wè ò nɑ̀kɛ́ tì.

¹⁹Dɛ kóò dìmɑ́ɑ̀sì kó kuyuoku kòo tɑncɔ́ùmbɛ̀ ntíkú tɛcĩ́ɛ̃̀tɛ̀ mɑtɛ̀ miɛkɛ, kɛ kpetínnɛ́ yɛbòrɛ̀ kɛ pɑ̀ɑ́, mbɛ̀ dé mɛ̀ɛ̀ kpɛ́í nSifubɛ, kɛ̀ Yesu tɑroo kɛ́cómmú bɛ cuokɛ̀ kɛ dɔ̀: Kunɑɑtí ndi bonɛ̀!

²⁰Ò bɛ́i mmɛmmɛ kɛ́deè kɛ́bɛnkɛ o nɔu nɛ̀ o píkù kɛ̀ diwɛ̀ìi bɛ̀ pĩ mbɛ̀ yɑ̀mɛ̀ bɛ Yiɛ̀.

²¹Kɛ̀ Yesu yíɛ́ kɛ́bɛ́i nkɛ dɔ̀: Kunɑɑtí ndi bonɛ̀! N cicɛ n tɔ̃nní mɛ̀ɛ̀ botí m mɛ ndi tũɔ̃̀.