Isɑ̃ɑ̃ 20:13-25

¹³Kɛ̀ yɛ̀ɛ ò bekɛ kɛ dɔ̀: Onitipòkù ɑ kuɔ̀nnɛ̀ bɑ? Kòo yɛ̀ tɛ̃̀ńnɛ́ kɛ dɔ̀: Bɛ̀ tùótɛ́ n Yiɛ̀ nwe, m mɛ nyí yɛ̃́ bɛ̀ ò yĩ́mɛ̀.

¹⁴Ò bɛ́i mɛmmɛ kɛ́wɛ̃ɛ̃tɛ kɛ́yɑ̀ Yesu kòò còḿmú, ò mɛ nyí nhò bɑntɛ́.

¹⁵Kɛ Yesu ò bekɛ kɛ dɔ̀: Onitipòkù dɛ̀ dòmmɛ kɑ̀ɑ kuɔ̀? A wɑɑ̀ nwe? Kòo yɛ̀mmɛ̀ ńdo okũnyɔ́ɔ̀rìwè nwe, kɛ dɔ̀: Kɛ̀ fɔ̃́ɔ̃̀ ò tùótɛ́, m bɛnkɛ ɑ ò dɔú ndɛ̀ kɛ̀ n kɔtɛ kóò tùótɛ́.

¹⁶Kɛ̀ Yesu ò yu kɛ dɔ̀: Mɑɑri! Kòo bunnɔ́ɔ kɛ dɔ̀: Okótì! Nɛ̀ bɛ kó tinɑ́ɑǹtì miɛkɛ dɑbunnii!

¹⁷Kɛ̀ Yesu ò nɑ̀kɛ́ kɛ dɔ̀: Bɑ́ n kɑ́ɑ́kɛ́, m mu nyí dèkɛ n cicɛ borɛ̀. Kɔtɛ kɛ́nɑ́kɛ́ n kɔbɛ kɛ dɔ̀: N deètì n cicɛ borɛ̀ ndɛ, wèè tu di kóo cicɛ, Kuyie nkùù di te.

¹⁸Kɛ̀ Mɑɑri Mɑkitɑdɑɑ ɛì kouu kɔtɛ Yesu tɑncɔ́ùmbɛ̀ borɛ̀ kɛ dɔ̀: N yɑ̀mu ti Yiɛ̀. Kòo bɛ̀ nɑ̀kɛ́ wè ò nɑ̀kɛ́ tì.

¹⁹Dɛ kóò dìmɑ́ɑ̀sì kó kuyuoku kòo tɑncɔ́ùmbɛ̀ ntíkú tɛcĩ́ɛ̃̀tɛ̀ mɑtɛ̀ miɛkɛ, kɛ kpetínnɛ́ yɛbòrɛ̀ kɛ pɑ̀ɑ́, mbɛ̀ dé mɛ̀ɛ̀ kpɛ́í nSifubɛ, kɛ̀ Yesu tɑroo kɛ́cómmú bɛ cuokɛ̀ kɛ dɔ̀: Kunɑɑtí ndi bonɛ̀!

²⁰Ò bɛ́i mmɛmmɛ kɛ́deè kɛ́bɛnkɛ o nɔu nɛ̀ o píkù kɛ̀ diwɛ̀ìi bɛ̀ pĩ mbɛ̀ yɑ̀mɛ̀ bɛ Yiɛ̀.

²¹Kɛ̀ Yesu yíɛ́ kɛ́bɛ́i nkɛ dɔ̀: Kunɑɑtí ndi bonɛ̀! N cicɛ n tɔ̃nní mɛ̀ɛ̀ botí m mɛ ndi tũɔ̃̀.

²²Ò bɛ́i mmɛmmɛ kɛ́deè kɛ́fuutɛ bɛ ĩ́nkɛ̀ kɛ dɔ̀: Cɔutɛ́nɛ̀ Muyɑɑ́nsɑ̀ɑ̀mù.

²³Di bo cĩ́ɛ̃́ mbɛ̀ bɛ yɛi mbɛ̀ bo pɛ́tɛ́ mɛcĩ́ɛ̃́mmɛ̀, kɛ̀ di í cĩ̀ɛ̃́ mbɛ̀ bɛ yɛi, mbɛ̀ bɑ́ɑ́ pɛ́tɛ́ mɛcĩ́ɛ̃́mmɛ̀.

²⁴Dɛ̀ do sɔ̃́ nTomɑɑ, Yesu tɑncɔ́ùmbɛ̀ kóò mɔù, bɛ̀ tu wè Didimmu í dɛ̀ bo.

²⁵Kɛ̀ Yesu tɑncɔ́ùmbɛ̀ tɔbɛ̀ɛ ò nɑ̀kɛ́ kɛ dɔ̀: Ti yɑ̀ ti Yiɛ̀. Kɛ̀ Tomɑɑ dɔ̀: Kɛ̀ n yí yɑ̀ sikɑ̃ũ kó yɛbòrɛ̀ o nɔu kɛ bɑɑ́ n nɔ́mbii, kɛ̀ n yí bɑɑ́ n nɔ́mbii o píkù m bɑ́ n tɑ̃́.