Isáysa 1:3-20

³¿Antaati wakar wamkuree kuk nda mazinak? ¿Antaati burr minush tputs pang' watungasheem nachungak? Nda. Chinuz mang' ndunaritaa, mangoonkiya. Itaru, nuw tputsiri mangsharitssincha. Nuwaa nda pakchiyam chinakana; nda mangoonkana.

⁴¿Nuw siyaa yutaritshishpaneetsis tamaycheezi? Siy yutaritshisheetsimari uru chinaksa. ¡Siy shuchitampazis wipis ashirus yutaritshisheetsim kis chinaksa! Nuwaatssha Taarashipaneetsi arap kasarangsa. Nuw Apanlli siyaam Israelaamis taaritaati, ashiritaa siy nuwaa wanllitarangsa. Nuw siyaa kizpur chinarangitaati, ashiritaa siysa nuwaa natsaksa.

⁵¡Mangishis nuwaa kapeetamaam chinachintar ashiksa! Nuw siyaa kapungtaa pzkookpaz ashiruri, siyaa waniwantar ashkitaati, ashiritaa, nda siy kitsis mazinaksa. Muchis chuwimpaz ashiksa. Kapung tanukus, wizpuris ndunnaar taaksa.

⁶Nutsis kpumawpaz ashirus ashchiri shuneekiya. Nda pakchiyam matambish taaksa. K'tsimandis káyaru, muchipis wásur shuneekiya. Kpumaris, kuchakpaz ashiru kpuneekiya. Minamtiyam tputs siyaa nda istaku, irimiyapat taparat, taparat nda ashkiya, wásuree mayungamaama. Ashikpaz ashkitaatis, nda kitsis mazinakus, yutaritshishee kis chinaksa.

⁷Nuw siyaa waneektaati, itaru siysa nuwaa kuki nda payukus, kundararis siyaa kachingeersin, tsapuneetsis itutskachu, Mzarshitis mangutarisha taakiya. Ashkus, tatsumaris mangutarit itsankiya. Siyaa pangis tirooksin, yaktaris mzeeztar ashkiya. Saanasha anoo ngutis napataranll ashiksa. Kundararis tatsumareetsis kis shamangayarusin, katungkusin, kaching, kaching ashkanaya. Sodomshuch tamarangpari ashiritam tsapunis mangu kuree ashkiya.

⁸Kundararis siyaa pacharangusin, Siyonshuchis minamaritis katuchim taaksa. Na kundararis siyaam tsangakanaya. Siyonshuchis yakat tambpaz ashiru mzatsip upusanand xiyaa ashkiya. Sundarshat kachingamamari iturpipitaraa, iturpipitaraa ashishtangat ashkanaya.

⁹Kundararis ashirangtaa, nuw wizpurirpati, nuwamari kasiyeeruri, siyaa Utaáchcheetsis nayaniranguri, nda siy musá tsiparangsa. Ndunnaari siyaa istaranguri, Sodomaa, Gomorshuchee tamarangpari sheernapsinaya siyaa izuuru kachingaranganaya. Apanll áttanda tángcha, tárangiya nuwaatsi. Ashiriya, yutaritshishirimandis Apanllsha siyaa kapung waneekiya, nuw siyaa atina.

¹⁰Siy kurakis Sodomshuch tamapari ashirus mantsir taakis anis, Apanllee kuk kaapaniri mazinangtsa. Siy tputsis Gomorshuch tamapari ashirus yutarit taakis anis, kitsis zurampatari mazinangtsa. Apanll siyaa tayaspataku, anoo ngatintspa.

¹¹Apanll Taarashipan ateeja: ¿Mayaamsa nuwaam maachee zapan wayaksa? Opeejaa, wakaraatstam karupana, nuwaam wayayarus, muchkis, anoo nuw kapung tsachiktana. ¿Antaati wayungunoo muchkis, anoo nuw ksaja ishingchee? ¿Maacheetsi ursir ksatamtaja napkee?

¹²Siy nuwash pangi kuseerus, maacheetsi nuwaam yushindaktaateesa, itaru, ¿chak siyaa, ngutis Apanllish pang' xitangtsa, táranlla?

¹³Nuwaam maachee ngutis wayarintspa. Watam an msas nuwaam nda wanasiriwa. Tputsee tushaneeyarus, Tsup kaneeschish shambateeni, atitaateesa, Zar kanusishush tushiyani, atitaateesa, itaru wand yutaritshishee kis payuksa. ¿Antaati nuw piy shingtsa, tárangee? Anoo pamaam zandkeezi.

¹⁴Tsup kaneeschish yakchu anush shaniykis, anoo nuw ksaja napkee. ¿Wanip ngutis ashiksa? ¡Wappa! Anoo zandkeezi.

¹⁵Siy nuwaa mashamaam kuweetsis íwar itsirkachis, anoo nuw pamaam zandkeezi. Zapantaa nuwaa mashkus, ashiritaa siyaa nda mazinakina. Watam kuwis tputs ursir paxatasawa.

¹⁶¡Watsta! Yutaritshishireetsis ksangtsa. ¿Antaati siyaa yutaritshishireetsis nuw kis napkee? ¡Yutaritshishireetsis zurampatari ksangtsa!

¹⁷Wanasiriri taangtsa. Anoori chinangtsa. Itsinsaru taangtsa. Tputsee chinangtsa. Saanpatatis istangtsa. Mxaxzeewaa nayaningtsa. Mashindoo tayutaritarinllpa, Apanlli siyaa Utaáchcheetsis tárangiya.

¹⁸Apanll átcha: Mazinangandama. Na tsiyatssee wanasir yareeni. Wandaya siy yutaritshishiris kuraspaz ashiru kizpur chumbeep paxataru, ashiritaa nuw tachingkachuri, kizpur mburash taatssa. Kachizamash tamapari ashiru mburash taatssa. Mishat, kamis kizpur kawambanataa, itaru opeej pur tamapari ashirisha mburash taachiya. Nuw siyaa yutaritshishireetsis tachingkachuri, amb ashikpaz ashtatssa.

¹⁹Wandaya siy nuwaa kuki payukchus, yusur mzarshis yuwariz kisshaparee kanungchiya.

²⁰Wandaya kitsis nda mazinakus, kundararis waani shamangayarusin, siyaa kiyung yachachintsa. Nuw Apanlli siyaa atina, Apanll waana nuwaa tárangiya. Ashirucha, Apanllee zurumpatari chinangtsa, nuw Isáysi siyaa atashina.