IOSUA 22:11-27

¹¹Bena Israel taudia ese harina e kamonai: haida eto, A itaia, Ruben taudia bona Gad taudia bona Manase iduhuna kahana taudia ese ihaboulaina patana ta vada e larebaia, Kanaan tanona hetoana ai. Ioridane sinavaina isena ai, Israel taumui emui tano lalonai.

¹²Israel taudia ese una hari e kamonai, bena iboudiai na Silo ai e hebou, bae tuari henidia eto.

¹³Bena Israel taudia ese hahelaḡa tauna Eleasara natuna Fineha e siaia, Gilead tanona bainela, Ruben bona Gad taudia bona Manase iduhuna kahana taudia dekediai.

¹⁴Hanua lohiadia gwauta danu ia ida e siaidia, Israel iduhudia ta ta amo; iboudiai na edia iduhu ikwaradia taudia.

¹⁵Idia na Ruben taudia bona Gad taudia bona Manase iduhuna kahana taudia dekediai e kau, Gilead tanona ai; bena e hamaorodia, eto,

¹⁶Iehova ena orea idoinai ini e gwau tomamu: Ina kerere vada o havaraia anina be dahaka? Israel Diravana enai vada o kerere; hari dina ai Iehova ena amo vada o raka oho, vada o gwau edeede henia, ihaboulaina patana vada o larebaia.

¹⁷Eda kara dika Peoro ai dia bada a? Ena be Iehova ena orea latanai hisihisi e kau, to una dika amo do asita ḡoeva.

¹⁸Matona, hari dina ai Iehova ena amo ba raka oho a? Hari dina ai umui ese Iehova o gwau edeede heniamu; kerukeru ia ese Israel besena idoinai baine badu henida.

¹⁹Emui tano basinema ḡoeva, boma hanai, Iehova ena tano, ena dubu e ginimu tanona, lalonai ahumui boma abi, ai bogaragimai ai. A Iehova basio gwau edeede henia, bona ai danu gwau-edeede taudia ai basio halaomai; ihaboulaina patana idauna ta, dia Iehova, eda Dirava, ena, basio larebaia.

²⁰Akan Sera na e gwau ahu ḡaudia ai e kerere, bena badu na Israel oreana idoinai latanai e kau, ani? Davana na mase, bona dia ia sibona latanai.

²¹Bena Ruben taudia bona Gad taudia bona Manase iduhuna kahana taudia ese Israel ikwaradia taudia e haere henidia, eto,

²²Dirava korikori na Iehova! Dirava korikori na Iehova! Ia dibana, bona Israel danu baine diba: bema Iehova a gwau edeede henia eiava vairanai a kara havara, hari dina ai basio hamaurimai.

²³Eiava bema hari ihaboulaina patana a larebaia Iehova idadaraina totona, eiava latanai ḡole-oho bouboudia eiava flaoa bouboudia eiava herohemaino bouboudia baia hahelaḡadia totona, Iehova ese davana baine henimai.

²⁴Lasi, ai na a larebaia, kerukeru vanegai umui natumui ese ai natumai bae gwau henidia na garina, baeto “Iehova, Israel Diravana, enai dahaka bavabia?

²⁵Iehova ese Ioridane sinavaina na hetoa ai vada e halaoa, ai bona umui Ruben taumui bona Gad taumui padadai; umui na asi ahumui Iehova enai.” Natumui unu bema gwau toma, bena ai natumai ese Iehova itomadiho-henina bema rakatania.

²⁶Taunabunai, a hereva heheni, ato, Mani ihaboulaina patana ta aita larebaia, dia gole-oho boubouna eiava boubou ta ḡauna,

²⁷a toa, ai bona umui padadai, bona ai garamai bona umui garamui padadiai, ai na Iehova itomadiho-henina totona emai ḡole-oho bouboudia bona emai herohemaino bouboudia bona emai boubou haida a hahelaḡadiamu; kerukeru vanegai umui natumui ese ai natumai bae gwau henidia na garina, baeto “Umui na asi ahumui Iehova enai”.