Iosua 18:1-7

¹Ma ra tarai Israel par dia ga ki varurung aro Silo, ma dia ga vatur ra pal na varbarat ie; ma dia ga tar uvia pa ra gunan.

²Ma lavurua na vuna tarai boko pire ra tarai Israel ba pa di ga tibe tar boko ta pakana ta diat.

³Ma Iosua i ga biti ta ra tarai Israel dari: Aivia ra bung ava vavuan boko upi avat a ongor pa ra gunan nina ra Luluai ra God kai ra umana tama i vavat i ga tul tar ia ta vavat?

⁴Avat a pilak tar ta ututul a tutana ure tikatika na vuna tarai, ma ina tulue diat upi diat a vana ma diat a valivute ra gunan, ma diat a tumu ra lavur magit ure varogop ma kadia lavur kakalai; ma diat a talil mulai tadav iau.

⁵Ma diat a tibe upi na lavurua na pakana; Iuda na ki vatikai ta kana langun ta ra papar a taubar, ma diat ta ra kuba i Iosep diat a ki vatikai ta kadia langun ta ra papar a labur.

⁶Ma avat a tumu ra varvai ure ra lavurua na tiniba ta ra gunan, ma avat a kap ra varvai uti piragu; ma ina padapadailam upi kavava tiniba ati ta ra luaina mata i ra Luluai kada God.

⁷Ma ra tarai Levi pa dia vatur vake ta tiniba pire vavat, tago ra papalum na tena tinabar kai ra Luluai kadia tiniba; ma Gad ma Ruben ma ra ngungu vuna tarai Manase dia tar alube pa kadia tiniba ta ra papar a Iordan maro ta ra matana taur, nina ba Moses ra tultul kai ra. Luluai i ga tul tar ia ta diat.