IOSUA 15:8-27

⁸Ene Rogele dekena amo ma ia lao, Hinoma ena Koura dekena amo, ela bona Iebusu Ororo, ena ladana ta be Ierusalema, ena diho kahana. Unuseni dekena amo ma ia lao, ela bona Hinoma Koura unai kahana ororo ena ataiai, dina diho kahana dekenai. Unai be Repaima Koura dokona mirigini kahana dekenai.

⁹Unai ororo ena ataiai dekena amo tano hetoana ma ia lao, ela bona Nepetoa ranu gabuna, ma ia lao, ela bona Eparona Ororo ena hanua maragidia. Unai gabu dekena amo tano hetoana be ia diho lao ela bona Bala, ena ladana ta be Kiriata Iearimi.

¹⁰Ma Bala ena dina diho kahana dekena amo tano hetoana be ia hagegea lao ela bona Seiri Ororo. Vadaeni Iearimi Ororo, (ladana ta be Kesalono), mirigini kahana dekenai ma ia lao, ela bona Bete Semese. Unai gabu ia hanaia, bona Timuna dekenai ia ginidae.

¹¹Ma tano hetoana be Ekarona Ororo ena mirigini kahana dekena amo ia hagegea lao, ela bona Sikerono, ma ia lao, ela bona Bala Ororo. Vadaeni Davara Badana ena kone dekenai ia ginidae, Iabinele dekenai.

¹²Iuda iduhu ena dina diho tano hetoana be Davara Badana ena kone. Iuda iduhu taudia edia bese ta ta dekenai idia henia tano hetoana be unai.

¹³Iosua ese Kaleba Iepune dekenai Iuda iduhu ena tano kahana ta ia henia, Lohiabada ese ia oda henia hegeregerena. Kaleba ena tano be Kiriata Araba. Inai Araba be Anaki ena tamana, bona iena ladana ta be Heberona.

¹⁴Vadaeni Kaleba ese Heberona dekena amo Anaki bese toi ia lulua ore, Sesai, Ahimana bona Talimai.

¹⁵Unai murinai Kaleba ese Debiri, ena ladana gunana be Kiriata Sepere ia tuari henia.

¹⁶Kaleba ia gwau, “Kiriata Sepere do ia halusia bona do ia abia tauna dekenai lauegu natuna kekeni Akisa do lau henia, iena adavana.”

¹⁷Vadaeni Otoniele Kena, Kaleba ena tadina Kena ena natuna ese Debiri hanua ia abia, vadaeni Kaleba ese iena natuna kekeni Akisa be Otoniele dekenai ia henia, iena adavana ia halaoa.

¹⁸Idia ruaosi idia headava murinai, Otoniele ese iena hahine Akisa dekenai ia hereva goada, Akisa ese iena tamana do ia noia, tano ta do ia henia totona. Vadaeni Akisa be iena tamana Kaleba dekenai ia lao. Iena doniki dekena amo ia diho neganai Kaleba ese ia nanadaia, ia gwau, “Oiemu ura be dahaka?”

¹⁹Hahine be ia haere, ia gwau, “Lau ura harihari gauna ta lau dekenai do oi henia. Guna oi ese Negebe ena tano ta lau dekenai oi henia, to ranu be lasi. Lau ura, harihari ranu gabudia danu lau dekenai do oi henia.” Vadaeni Kaleba ese ranu gabudia ia henia, atai kahanai bona henuna kahanai ranu gabudia ia henia.

²⁰Inai tano be Iuda taudia edia bese ta ta ibounai idia abia, edia tano korikori:

²¹Iuda taudia edia hanua, Negebe kahanai, Edoma ena tano hetoana ena badinai, edia ladana be inai: Kabisele, Edere, Iaguru,

²²Kina, Dimona, Adaba,

²³Kedesi, Hasoro, Itinana,

²⁴Sipi, Teleme, Bealoto,

²⁵Hasoro Hadata, Kerioto Hesarona (ena ladana ta be Hasoro),

²⁶Amama, Sema, Molada,

²⁷Hasara Gado, Hesemona, Bete Pelete,