IOSUA 13:3-26

³Sihoro, Aigupto mairiveina kahana tanona, amo mirigini kahana e laomu ela bona Ekron hetoana na Kanaan taudia edia tano e tomamu. Filistia lohiadia na laima: Gasa lohiana, Asdod lohiana, Askelono Iohiana, Gata lohiana, bona Ekron lohiana. Avim taudia edia tano danu do asio abia.

⁴Diho kahana ai dounu mimia tanodia be Kanaan taudia edia tano idoinai; bona Meara, Sidono taudia edia tano, ela bona Afek, ela bona Amoro taudia edia tano hetoana;

⁵bona Gebala taudia edia tano, bona Lebanon tanona idoinai, mairiveina kahana ai, Baal-gad amo, Heremon ororona badi-tanona ai, ela bona Hamat raka-vareaina.

⁶Ororo ai e nohomu taudia iboudiai, Lebanon amo ela bona Misirefoto-maimi, Sidono taudia iboudiai, lau ese baina luludia lasi Israel taudia vairadiai. Ḡau tamona, tano na ba haria, Israel taudia ahudia ba henidia.

⁷Taunabunai ina tano ba haria, iduhu taurahani-ta bona Manase iduhuna kahana na ahudia ba henidia.

⁸A Manase iduhuna kahana na Ruben bona Gad iduhudia ida ahudia vada e abi guna; Mose ese e henidia, Ioridane sinavaina mairiveina kahana ai. Iehova ena hesiai tauna Mose ese e henidia:

⁹Aroere amo, Aranon kourana isena ai, bona koura bogaragina hanuana amo bona Medeba taorana amo ela bona Dibon;

¹⁰bona Sihon, Amoro taudia edia lohia, Hesebon pavapavana, ena hanua iboudiai, ela bona Amono taudia edia tano hetoana;

¹¹bona Gilead; bona Gesuru taudia bona Maakata taudia edia tano; bona Heremon ororona idoinai; bona Basan idoinai ela bona Saleka,

¹²Og, Astaroto bona Edrei pavapavana, ena tano idoinai Basan ai. Hari Og be Refaim tauna; Refaim besena idoinai ia mo sibona dounu noho. Ini na Mose ese e hadareredia bena e luludia lasi.

¹³Ḡau tamona, Israel taudia na Gesuru taudia bona Maakata taudia asie luludia lasi; Gesuru taudia bona Maakata taudia na doini Israel taudia bogaragidiai e nohomu ema bona harihari.

¹⁴Levi iduhuna taudia mo Mose ese tano ta se henidia, badina be Iehova, Israel Diravana, vada e hereva, boubou ḡaudia lahi ai e gabudia na idia ahudia.

¹⁵Mose ese Ruben iduhuna taudia na edia doḡoro ta ta ai ahudia e henidia.

¹⁶Edia tano na Aroere amo e matamaiamu, Aranon kourana isena ai. Koura bogaragina hanuana na idia edia, bona Medeba taorana idoinai.

¹⁷Hesebon danu edia, mai ena taora hanuadia iboudiai; bona Dibon, bona Bamoto-baal, bona Bete-baal-meono;

¹⁸bona lahasa, bona Kedemoto, bona Mefata;

¹⁹bona Kiriataimi, bona Sibma, bona Seretesahara, una koura ororona ai;

²⁰bona Bete-peoro, bona Pisga ororona gabaena, bona Bet-iesimoto.

²¹Taora hanuadia iboudiai na idia edia; bona Sihon, Amoro taudia edia lohia, Hesebon pavapavana, ena basielia idoinai. Una Sihon na Mose ese e hadarerea: ia bona Midian lohiadia, Evi bona Rekeme bona Suru bona Huru bona Reba. Una na Sihon ena basileia lohiadia, una tano e noholaia.

²²Balaam Beoro danu, rohe tauna ta, Israel taudia ese dare amo e alaia mase, taunimanima loḡora ida.

²³Ruben iduhuna taudia edia tano hetoana na Ioridane sinavaina isena. Ruben iduhuna taudia ahudia bunu, edia deḡoro ta ta amo bona edia hanua badadia bona maraḡidia ta ta amo e abi.

²⁴Mose ese Gad iduhuna taudia na edia doḡoro ta ta ai ahudia e henidia.

²⁵Edia tano na lasere, bona Gilead hanuadia iboudiai, bona Amono taudia edia tano kahana, ela bona Aroere, Raba mairiveina kahana ai.

²⁶Hesebon amo ela bona Ramata-mispe bona Betonimi danu idia edia; bona Mahanaim ela bona Debiri hetoana.