Iosua 13:2-17

²Ra malala ne huriki a Palestina, a malala ne huriki a Gesur i tababana:

³i tubu na naru e Sihor na nirikena haro o Egipto, i lakea na robo e Ekron na tabeke mule sike, ra tabeke iea i matakaria e Kenan; a malala ne huriki a matakari o Palestina ri made o Gasa, o Asdod, o Askelon, o Get, o Ekron; a malala ne huriki a Avim

⁴na tabeke mule puru; a malala ne huriki a Kenan; a tanga e Meara na malala ne huriki a Sidon, i lakea na tanga e Apek na nagi na malala ne huriki a Amor;

⁵a malala ne huriki a Gebal; a malala lobo ne Lebanon i tubu na tabeke na nirikena haro na tanga e Bal-Gad, tabukoi na lolo e Hermon, i harena na dala lakea o Hamat;

⁶a malala ne huriki e Sidon ri made na maka tanga na kurukuruna maka lolo ne Lebanon; a tanga e Misrepot-Maim. Iau kunana ga lili tala a kabu nga, o bole a malala ne ria, o veru na maka kabu ne Israel, ge ne ria liu. O ramai a ngava a taki.

⁷O verua ra malala nga na kabu i polova turana a kalavana kabu ne Manase, ri gi bole, ge ne ria liu.”

⁸A kabu ne Reuben, ne Gad, a kalavana kabu ne Manase, ri bole a malala na tabeke na nirikena haro na naru e Iordan. E Moses a vora ne BAKOVI DAGI i habi ne ria pali.

⁹A malala ne ria i tubu na tanga e Aroer na harena maloku na naru e Arnon, i lakea mai a tanga i pesi na kurukuruna maloku iea. Ra malala iea i bole loboa a bilane Medeba i harena na tanga e Dibon.

¹⁰Ri bole lobo a maka tanga ne Sihon, a hariki ne huriki a Amor. Hosi e Sihon i made na tanga e Hesbon, i matakari a maka tanga i harena na nagi ne huriki a Amon.

¹¹Ri bole tabua a malala ne huriki a Gilead, a tabeke ne huriki a Gesur a Makat, a tabeke na lolo e Hermon, a tabeke na robo e Basan i harena na tanga e Saleka,

¹²a malala lobo i matakari e Og na tahuna i matakari e Astarot e Edrei. E Og a hamone Repaim, ia a iku ne huriki a hariki lobo e Moses i rangi, i lili tala na vabinga.

¹³Pali e huriki a Israel i uka ma ri lili e huriki a Gesur a Makat. Ri tababana ni made turane ria i harena mona.

¹⁴Pali e Moses i uka ma i habia na kabu ne Levi tara tabekena malala. A maka nihabi ne huriki ri habi ne BAKOVI DAGI a Vure ne Israel, e huriki a Levi ri bole, i ramaia a nitane BAKOVI DAGI.

¹⁵E Moses i habi a tabekena malala na kabu takutaku ne Reuben, ri bole ne vone ria liu.

¹⁶A nagi na malala ne ria i tubu na tanga e Aroer na harena maloku ne Arnon, i lokovonga na tanga i pesi na kurukuruna maloku iea. Ra tabekena malala iea i bole loboa a bilane Medeba.

¹⁷Muri a nagi i lakea na tanga e Hesbon i lokovonga i bele na maka tanga na bila: e Dibon, e Bamot-Bal, e Bet Bal-Meon,