Iosua 13:11-31

¹¹ma Gilead, ma ra langun kai ra tarai Gesur ma Makat, ma ra luana Kermon par, ma ra gunan Basan tuk tar uro Saleka;

¹²a gunan par kai Og aro Basan, nina i ga varkurai aro Astarot ma Edrei, (ia ka i ga ki valili ta ra tarai Repaim); tago Moses i ga ubu diat ma i ga korot vue diat.

¹³Ma ra tarai Israel pa dia ga korot vue ra tarai Gesur ma ra tarai Makat; a tarai Gesur ma ra tarai Makat dia ki livuan ta ra tarai Israel tuk tar ta go ra bung.

¹⁴Ia kaka ra vuna tarai Levi pa i ga tul tar ta gunan ta diat upi diat a kale; a tinabar ika di tuntun tar ia ma ra iap tadav ra Luluai ra God kai Israel nam uka kadia tiniba, da i ga ve diat.

¹⁵Ma Moses i ga tabar ra vuna tarai Ruben varogop ma kadia lavur apik na tarai.

¹⁶Ma kadia langun i ga tur pa ia papa aro Aroer nina i ki ta ra papar a male Amon, ma ra pia na pal i ki livuan ta ra male, ma ra tamataman par maravai Medeba;

¹⁷Kesbon ma kana lavur pia na pal ta ra gunan i tamataman; Dibon, ma Bamot-Baal, ma Bet-Baal-Meon,

¹⁸ma Iasa, ma Kedemot, ma Mepat,

¹⁹ma Kiriataim, ma Sibma, ma Seret-Sakar ta ra luana kai ra male,

²⁰ma Bet-Peor, ma ra papar a luana Pisga, ma Bet-Iesimot,

²¹ma ra lavur pia na pal ta ra gunan i tamataman, ma ra gunan kai Sikon ra king kai ra tarai Amor, nina i ga varkurai aro Kesbon, nina Moses i ga ub ia, diat varurung ma ra umana luluai Midian, Evi, Rekem, Sur, Kur ma Reba, a umana luluai kai Sikon nina dia ga ki ta nam ra gunan.

²²A tarai Israel dia ga doko bula Balam natu i Beor a tena papait ma ra pakat na vinarubu, varurung ma ta ra umana dia ga doko diat.

²³Ma ra Iordan ia ra langun kai ra tarai Ruben ma ra gunan i maravai tana. Go ra gunan ia ra tiniba kai ra tarai Ruben da kadia lavur apik na tarai, a lavur pia na pal ma kadia lavur gunan ik.

²⁴Ma Moses i ga tabar ra vuna tarai Gad, ra umana bul mur tai Gad, varogop ma kadia lavur apik na tarai.

²⁵Ma kadia langun Iaser ma ra lavur pia na pal Gilead, ma ra ngungu ta ra gunan kai ra tarai Amon, tuk tar uro Aroer nina i ki ta ra luaina mata i Raba,

²⁶ma papa aro Kesbon tuk tar uro Ramat-Mispe ma Betonim, ma papa aro Makanaim tuk tar ta ra langun Debir,

²⁷ma ta ra male, Bet-Aram, Bet-Nimra, Sukot, ma Sapon, nina dia ki valili ta ra gunan kai Sikon ra king Kesbon, a Iordan ia ra langun tana, ma i tuk tar ta ra tava kikil Kineret ta ra papar a Iordan maro ta ra matana taur.

²⁸Go ia ra tiniba kai ra tarai Gad da kadia lavur apik na tarai, a lavur pia na pal ma kadia lavur gunan ik.

²⁹Ma Moses i ga tabar ra ngungu vuna tarai Manase; a ngungu ta ra vuna tarai Manase dia ga kale varogop ma kadia umana apik na tarai.

³⁰Ma kadia langun i ga tur pa ia aro Makanaim, Basan parika, a gunan par kai Og ra king Basan, ma ra lavur pia na pal kai Iair nina dia tur ta ra gunan Basan, laptikai na vinun na pia na pal,

³¹ma ra ngungu tai Gilead, ma Astarot ma Edrei, a ura pia na pal ta ra gunan kai Og aro Basan; di ga tul tar go diat ta ra tarai Makir natu i Manase, ure ra tarai Makir nam ra ngungu vuna tarai, varogop ma kadia umana apik na tarai.