Ioni 6:52-64

⁵²Ka me Iudea‑naia avaha ya vonana inononi, matataui ivi‑gwahegwahea, ivona, “Medeina onoto taina ana pata viona na‑veneka, kanꞌ‑ania?”

⁵³Ka Iesu vonei, ivona, “Memeanina nuami vi‑tupatupa, kate avonemi, yauke Tauna Vi‑tomotau. Aituhu itomi eha viou unꞌ‑ania, ka aituhu eha dayahiu una‑nim, akanai itomi eha yawayawaimi.

⁵⁴Kate aituhu aviyaivia viou ianiania, kadu aituhu dayahiu inimnim, akanai taui avaha yawai‑vavaha ivaniahei, ka auyewa pai nau‑yehata wayahina anigea asi‑vi‑mini‑havinei.

⁵⁵Iuna viou anini‑hoina, kadue dayahiu pai maga biga‑vavaha.

⁵⁶Wayahina, aituhu aviyaivia viou ianiania kadue dayahiu inimnim, taui niheniua imamaei, kadue yauke nihenia amamaei.

⁵⁷Amau yawayawaina, ka tauna vi‑tuneu, kadu yauke yawayawaiu iuna tauna. Wayahina, aituhu aviyaivia yauke taua ianianiu, akanai taui yawayawai iuna yauke aitamoata deina.

⁵⁸Aniani taina wahuma opu‑me. Kate eha aninina yami tupua‑nenenehi anata nihenina iania deina, e apaina ianiga. Aituhu aviyaivia aniani taina ianiania, taui yawayawai imaꞌ‑vavaha.”

⁵⁹Iesu vonaia habuhabui haeyei tutana tauna viwavenena manua tapanono nihenina papani Kapenaum nihenina.

⁶⁰Ka a tau vi‑muni habuhabui Galili nihenina imamaei, kate avaha Iesu ya vonana inononi, e taui matataui ivonavona, “Viwavenena tanoi vita‑vainena. Medeina kawaehe? Eha aka pata.”

⁶¹Ka Iesu avaha mai‑anamanei vonana wayahina inau‑vonuvonu, e wayahia ivona, “Vonana viteyemi, a?

⁶²Yauke Tauna Vi‑tomotau. Aituhu avane papani‑nana wayahina nonova aopu‑me, kadue aituhu itomi udueyeu, kaiwadi, auyewana wayahina medeina unuanua?

⁶³Yaubada Nuana Ahihinata, tauna a heta‑ohota yawai iuna. Ka tomotau yai bagibagi eha aitam aviani. Ka yau vonaia avaha avonemi, ka vonaia vivane Yaubada Nuana, kadu vonaia vivane yawai‑hoina.

⁶⁴Ka tupwami eha uta‑vitumahaneu.” (Iesu vonaia tomani iuna tauna mai‑anamanei taui eha ita‑vitumahana, kadu tauna mai‑anamanei koiaka a tau vi‑nua‑hauhauna.)