Ioanes 9:31-40

³¹Si lohoka vona a Vure i uka ma i longo mai e huriki a bakovi hale. I longo mai kunana e huriki ri kavurike ia, ri ramai a ningaru vona.

³²I uka ma ni matai hosi tara viri ge vakamatapara a bakovi i kepa na tahuna ni poda tala.

³³Pali ra bakovi iea, a Vure i uka ma i rudua ge valai, i uka ma ge ratea tara maki mavonga.”

³⁴Lakea ri koli mule ri ta maea, “I navai o vara kolikoli mia? A naro hale i madoko vomu na tahuna ni poda tala.” Muri ri tono talea ge vano liu.

³⁵E Isu I longoa a bakovi iea ni tono tala liu, lakea i vano i masia, i takia, “Ioe o luhoi tora a Tuna Bakovi?”

³⁶A bakovi iea i koli, i ta maea, “Bakovi Dagi, e rei a bakovi iea? O vakasiri iau vona ga luhoi tora ia.”

³⁷Lakea e Isu i ta maea, “Ra bakovi iea o masia pali, ngane i ta turamu.”

³⁸Muri a bakovi i kavurikea e Isu, i ta maea, “Bakovi Dagi, a luhoi tora ioe.”

³⁹Lakea e Isu i ta maea, “A puru valai na malala ga pelekado e huriki. E huriki a kepa ri gi matapara, e huriki ri matapara ri gi kepa.”

⁴⁰E huriki a Pariseo ranga ri laho turana ri longoa a nitana, ri nanea, “I navai? O luhoi mia ranga mi kepa?”