Ioanes 8:43-59

⁴³I navai i uka ma mu longokilala a hini a taki? I uka ma mu longokilala, a vuhuna mu koi ni longo a ngavagu.

⁴⁴Mua e huriki e tune Satan, lakea mu ngaru ni muri mai a ningaru vona. Muga na hunu a malala ni ratarike, ia a bakovi ni rabalaki a viri, i koi ni muri mai a ngava muholi, a vuhuna i uka tara ngava muholi ge takia. Na tahuna i tami a viri, i ta na tabelena, a vuhuna ia a marapusi, a tamana marapusianga.

⁴⁵Pali i uka ma mu luhoi tora iau, a vuhuna iau a ta muholi!

⁴⁶E rei tara ne mua ge vakasiri, iau a rata a naro hale? Iau a ta muholi, pali i navai i uka ma mu luhoi tora iau?

⁴⁷E huriki a tuna Vure ri longototo a ngava a Vure i taki. Pali mua i uka ma mu longototo a Vure, a vuhuna i uka ma mua e huriki e tuna.”

⁴⁸E huriki a Iuda ri koli a nita ne Isu ri ta maea, “I muholi ioe a bakovi o Samaria, i dili vomu a hanitu.”

⁴⁹E Isu i koli, i ta maea, “Iau, i uka ma i dili nau a hanitu. Iau a togoa e Tata, pali mua i uka ma mu togo iau.

⁵⁰Iau i uka ma a ngaru e huriki ri gi kavurike iau. Pali a Vure ia a mari ni pelekado a narone huriki. I ngaru e huriki ri gi kavurike iau.

⁵¹A taki muholi mua, e rei a viri i muri mai a ngavagu, i uka ma ge mate.”

⁵²Na tahuna e huriki a Iuda ri longoa a ngavana ri kaha, ri ta maea, “Ngane mi lohoka vomu i dili vomu a hanitu! E Abraham i mate, e huriki a propet ri mate, pali ioe o taki ta a viri ge muri mai a ngavamu, i uka ma ge mate!

⁵³Ra ioe, o dagi hateka ne tamane mia e Abraham? E Abraham i mate, e huriki a propet ri mate. Pali ioe o luhoi ge ioe e rei ke?”

⁵⁴E Isu i koli, i ta maea, “Iau bara kavu­rike mule iau, a nikavurike nau a maki tavula. E Tata ra mu takia ta ia a Vure ne mua, ia ra viri i kavurike iau.

⁵⁵Iau a lohoka vona, pali mua i uka ma mu lohoka vona. Iau bara taki i uka ma a lohoka vona, bara marapusi manga mua, pali iau a lohoka vona, a longo­totoa a nitana.

⁵⁶E tamane mua e Abraham i pasimata ni matai a parava nau. Pali ngane i masia pali a parava iea, i vivi hateka.”

⁵⁷E huriki a Iuda ri hehe, ri ta maea, “A pida vomu i uka ma i ravulu lima ma, pali o taki ioe ta o masia pali e Abraham.”

⁵⁸E Isu i koli, i ta maea, “A taki muholi mua, muga ne Abraham ni poda, iau kunana ra iau!”

⁵⁹Na tahuna i ratea a ngava iea, lakea e huriki a Iuda i madihi a hatene ria, a vuhuna i taki ta ia a Vure. Lakea ri bole rike a kedo ta ri gi padi­matea. Pali e Isu i kapiloho ne ria, i laho tala na tabeke tara na roho na Vure i vano.